लंडन : मागील दोन वर्षांपासून करोनाने जगाला हैराण करून सोडले आहे. दरम्यान,करोनाला रोखण्यासाठी लस हाच एकमेव उपाय आहे. दरम्यान, आता करोनाच्या प्रसारासंदर्भात एक धक्कदायक माहिती समोर आली आहे. आजपर्यंत लस न घेतलेल्या लोकांकडून करोनाचा प्रसार मोठ्या प्रमाणात होत असल्याचे आपण पहिले आहे. मात्र आता चिंता वाढवणारी बातमी समोर आली आहे. करोनाच्या डेल्टा विषाणूचा प्रसार हा दोन्ही लसी घेतलेल्या लोकांकडूनही मोठ्या प्रमाणात होण्याचा धोका असल्याचे एका संशोधनातून समोर आले आहे.
ब्रिटनमध्ये करण्यात आलेल्या एका अभ्यासातून करोनाच्या डेल्टा संदर्भात माहिती देण्यात आली आहे. लॅन्सेट नियतकालिकात प्रसिद्ध झालेल्या लेखात ही माहिती देण्यात आली आहे. लस घेतलेल्या लोकांना जर पुन्हा करोना संसर्ग झाला तर त्यातून ते लवकर बरे होतात. मात्र, तेही लस न घेतलेल्यांप्रमाणेच डेल्टा विषाणूचा प्रसार करण्याची शक्यता असते.
करोना प्रतिबंधक लस घेतल्यामुळे रुग्णांच्या मृत्यूचे प्रमाण कमी झाले आहे. या लसी डेल्टा विषाणूवर कमी परिणामकारक आहेत असा काही शास्त्रज्ञांचा दावा आहे. करोनाचा संसर्ग घरातील व्यक्तींपासून सर्वांत जास्त प्रमाणात होतो असे दिसून आले आहे. मात्र, लस घेतलेल्या लोकांकडून किती प्रमाणात करोना विषाणूचा प्रसार होतो यावर आणखी अभ्यास होणे आवश्यक आहे.
डेल्टा विषाणूमुळे अमेरिकेमध्ये करोना साथीची स्थिती आणखी गंभीर बनली. जगात अमेरिकेत सर्वाधिक प्रमाणात लसीकरण होऊनही तिथे कोरोना रुग्णांची संख्या व त्यांच्या मृत्यूचे प्रमाण सर्वांत जास्त आहे.
डेल्टा विषाणूने माजवलेल्या हाहाकारामुळे तेथील आरोग्य यंत्रणेवरही मोठा ताण पडला आहे. ब्रिटनमध्येही कोरोनामुळे गंभीर स्थिती निर्माण झाली. डेल्टा विषाणूला प्रतिबंध कसा करावा याकडे आता जगभरातील संशोधकाचे लक्ष लागले आहे.