पिंपरी – पनवेल येथे जमीन खोदकाम आणि सपाटीकरणाचे 15 कोटींचे काम मिळवून देतो, असे आमिष दाखवून आर्थिक फसवणूक केल्याचा प्रकार घडला आहे. या प्रकरणी फिर्यादीची साडे बारा लाख रुपयांची फसवणूक झाली असून दोघांवर गुन्हा दाखल करण्यात आला आहे. हा प्रकार किवळे-विकासनगर येथे घडला. श्रीमंत तुळजाराम शिवशरण (वय 58, रा. विकासनगर, किवळे) यांनी दिलेल्या फिर्यादीवरुन सचिन सिताराम माळी (वय 38, रा. भिमा कोरेगाव, ता. शिरूर), सिराज असरफी (रा. नालासोपारा, पालघर, मुंबई) या दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार , फिर्यादी शिवशरण यांचा बांधकाम व्यवसाय आहे. आरोपींनी शिवशरण यांना पनवेल येथे 15 कोटी रुपयांचे अर्थमुव्हींगचे काम देतो, असे सांगून कामाचा आदेश देण्यासाठी 15 लाख रूपये घेतले. मात्र, कामाचा आदेश दिला नाही. व कामही दिले नाही. त्यानंतर शिवशरण यांनी पैशाची मागणी केली असता आरोपींनी 2 लाख 60 हजार रूपये त्यांना परत दिले. परंतु, उर्वरीत 12 लाख 40 हजार रूपये परत केले नाहीत. आपली फवसणूक झाल्याचे लक्षात येताच शिवशरण यांनी याबाबत देहुरोड पोलिसांत गुन्हा दाखल केला असून अधिक तपास देहुरोड पोलीस तपास करत आहेत.