Ladki Bahin Yojana: मुख्यमंत्री माझी लाडकी बहीण योजनेच्या पात्र लाभार्थी महिलांच्या खात्यात एप्रिल महिन्याच्या हप्त्याची रक्कम जमा होण्यास सुरुवात झाली आहे. राज्य सरकारने बुधवारी मार्च महिन्याचा हप्ता जमा केल्यानंतर गुरुवारी अनेक महिलांच्या खात्यात एप्रिल महिन्याचे १५०० रुपये जमा झाल्याचे संदेश प्राप्त झाले. त्यामुळे दोन दिवसांत लाभार्थी महिलांच्या खात्यात एकूण ३ हजार रुपये जमा झाले आहेत. मार्च आणि एप्रिल महिन्यांच्या हप्त्याची प्रतीक्षा करणाऱ्या कोट्यवधी महिलांना यामुळे मोठा दिलासा मिळाला आहे. यापूर्वी फेब्रुवारी महिन्याचा हप्ता २४ मार्च रोजी जमा करण्यात आला होता. त्यानंतर दोन महिन्यांच्या प्रलंबित रकमेकडे लाभार्थी महिलांचे लक्ष लागले होते. अखेर १४ आणि १५ मे रोजी अनुक्रमे मार्च व एप्रिल महिन्यांचे हप्ते वर्ग करण्यात आल्याने महिलांमध्ये समाधान व्यक्त होत आहे. महायुती सरकारने लोकसभा निवडणुकीनंतर जुलै २०२४ पासून ही योजना सुरू केली होती. या योजनेंतर्गत पात्र महिलांना दरमहा आर्थिक मदत दिली जाते. लाभार्थी महिलेच्या कुटुंबाचे वार्षिक उत्पन्न अडीच लाख रुपयांपेक्षा कमी असणे हा प्रमुख निकष ठेवण्यात आला आहे. हेही वाचा – जमिनीच्या नोंदीसाठी 20 हजारांची लाच; महसूल विभागातील दोन महिला कर्मचाऱ्यांना अटक दरम्यान, योजनेतील पात्र लाभार्थी निश्चित करण्यासाठी शासनाने ई-केवायसी प्रक्रिया राबवली होती. काही महिलांनी अर्जात शासकीय नोकरीसंदर्भातील चुकीचे पर्याय निवडल्याने त्यांना दुरुस्तीसाठी ३० एप्रिलपर्यंत मुदत देण्यात आली होती. योजनेच्या सुरुवातीला लाभार्थी महिलांची संख्या सुमारे २ कोटी ४६ लाख होती. मात्र, ई-केवायसी पूर्ण न केल्याने फेब्रुवारी २०२६ पर्यंत ही संख्या घटून १ कोटी ७६ लाखांवर आली आहे. जवळपास ७० लाख महिलांना ई-केवायसी अपूर्ण राहिल्यामुळे योजनेतून वगळण्यात आल्याची माहिती समोर आली आहे.