कोयनानगर – कोयना विभागातील दुर्गम असणाऱ्या बाजे (नानेल) येथील तुकाराम धोंडिंबा मोरे (वय 55) यांना अज्ञाताने कुऱ्हाडीने वार करून गंभीर जखमी केले. त्यांना बेशुद्ध अवस्थेत कृष्णा हॉस्पिटल कराड येथे पुढील उपचारार्थ दाखल करण्यात आले असून या प्रकरणी कोयनानगर पोलीस ठाण्यात गुन्हा नोंद झाला आहे.
याबाबत कोयनानगर पोलिसांनी दिलेली माहिती अशी, तुकाराम धोंडीबा मोरे हे गुरुवारी रात्री बाजे (नानेल) येथील राहत्या घराच्या अंगणात जनावरांच्या गोठ्यानजीक झोपले होते. झोपण्यापूर्वी त्यांनी पत्नी सौ. वनिता तुकाराम मोरे यांना आपल्या टेंपोला उद्या सकाळी भैरमगडचे भाडे आहे, त्यामुळे सकाळी पाचला उठवायला सांगितले होते. त्यामुळे पहाटे पत्नी वनिता अंधारात त्यांना उठवायला गेल्या. त्यावेळी त्यांच्या हाताला रक्त लागले. त्यानंतर त्यांनी बॅटरीच्या मदतीने पाहिले असता अज्ञाताने तुकाराम मोरे यांच्यावर कुऱ्हाडीने वार केल्याचे त्यांना दिसले. यात तुकाराम मोरे हे रक्तबंबाळ व बेशुद्ध अवस्थेत तसेच जागेवर पडले होते. हल्ल्यासाठी वापरलेली कुऱ्हाड तिथेच टाकून संशयित पळून गेला होता. त्यानंतर वनिता मोरे यांच्या कुटुंबीयांनी ग्रामस्थांच्या साहाय्याने तुकाराम मोरे यांना कराड येथील कृष्णा रुग्णालयात दाखल केले. याबाबतची तक्रार वनिता मोरे यांनी केली असून पोलिसांनी अज्ञातावर गुन्हा दाखल केला आहे.