पालकमंत्री शंभूराज देसाई व जिल्हाधिकारी रुचेश जयवंशी यांच्या उपस्थितीत विविध कार्यक्रम
कोयनानगर : पहिले पंतप्रधान पंडीत जवाहरलाल नेहरु यांच्या जयंतीनिमित्त साजरा केला जाणारा बालदिन सातारा जिल्ह्यात पंडीत नेहरू यांचे स्मारक असलेल्या कोयनानगर येथील नेहरु स्मृती उद्यानात जिल्हा प्रशासनाच्यावतीने मोठया उत्साहात साजरा केला जाणार आहे. पालकमंत्री शंभूराज देसाई यांच्यासह जिल्हाधिकारी रुचेश जयवंशी यांच्या उपस्थितीत हा कार्यक्रम होणार असल्याची माहिती पाटणचे प्रांताधिकारी सुनील गाढे यांनी दिली.
पंडित नेहरू यांच्या कोयना भेटीची आठवण चिरंतर राहण्यासाठी ज्या टेकडीवर नेहरु उतरले होते. त्याठिकाणी कोयना प्रकल्पाने लाखों रुपये खर्च करुन नयनरम्य असे ‘नेहरू स्मृती उद्यान’ उभारले आहे.
गत १५ वर्षांपासून पाटण तालुक्याचे लोकप्रतिनिधी शंभूराज देसाई यांच्या संकल्पनेतून नेहरु उद्यानात प्रशासनाच्या वतीने बालदिन साजरा करण्यात येतो. दरवर्षीच्या बालदिनाला हजारों बालके या नेहरू उद्यानात येत असल्याने कोयनानगरला जणू बालनगराचे स्वरुप येत असते.
प्रशासनाच्यावतीने नेहरू उद्यानात ज्यांच्या संकल्पनेतून हा दिवस साजरा केला जातो तेच पाटण तालुक्याचे लोकप्रतिनिधी शंभूराज देसाई उत्पादन शुल्क या वजनदार खात्याबरोबर सातारा व ठाणे जिल्ह्याचे पालकमंत्री आहेत. यामुळे या कार्यक्रमाला विशेष महत्व प्राप्त झाले आहे. करोना संसर्गामुळे गत दोन वर्षं बालदिन कार्यक्रम साजरा झाला नव्हता. परंतु, यावर्षी बालदिन मोठया उत्साहात साजरा करण्यासाठी कोयनावासीय सज्ज झाले आहेत.
