पारनेर – तालुक्याच्या सामाजिक, राजकीय व क्रीडा क्षेत्रामध्ये उल्लेखनीय असे काम करत असलेल्या राजेश्वरी कोठावळे या महिला सक्षमीकरणासाठी उत्तम काम करत आहेत. तसेच त्यांनी क्रीडा क्षेत्राच्या माध्यमातून तालुक्यामध्ये अनेक महिला व मुलींना प्रशिक्षण देत कराटे, बॉक्सिंगसारख्या क्रीडा प्रकारामध्ये तालुक्यातील ग्रामीण भागातील खेळाडू घडवले आहे, असे प्रतिपादन आ. नीलेश लंके यांनी केले.
म्हसणे येथील समर्थ पॉलिटेक्निक इंजिनिअरिंग कॉलेजमध्ये पार पडलेल्या स्पर्धेच्या बक्षीस वितरण कार्यक्रमप्रसंगी ते बोलत होते. या वेळी कॉलेजचे संस्थापक गाडीलकर, श्रीयोग उद्योगसमूहाचे अध्यक्ष संजय तरटे, संतोष तरटे, भोगाडे, प्रशिक्षक सोहेल खान, मयुरी झरेकर, सूरज शिंदे, सानिया शेख, जिनत शेख, साहिल सय्यद, नीकिता औटी आदी उपस्थित होते.
स्पर्धेसाठी जिल्ह्यातील विविध शाळांचे एकूण 158 खेळाडू सहभागी झाले होते. स्पर्धेमध्ये एकूण 42 सुवर्णपदक, 38 रौप्य पदक व 32 कांस्यपदकांची खेळाडूंनी लयलूट केली. विजयी खेळाडूंना सन्मान चिन्ह प्रमाणपत्र देण्यात आले. स्पर्धा यशस्वीतेसाठी राजेश्वरी कोठावळे यांनी घेतलेल्या मेहनतीचे कौतुक केले.