Kolhapur Court news : कोल्हापूर येथील जिल्हा व सत्र न्यायालय परिसरात महिलेला मारहाण केल्याची धक्कादायक घटना समोर आली आहे. या प्रकरणी तब्बल १५ वकिलांविरोधात शहापुरी पोलीस स्टेशन येथे ॲट्रॉसिटी अंतर्गत गुन्हा दाखल करण्यात आला आहे. ही घटना ७ मार्च रोजी दुपारी साडेतीनच्या सुमारास न्यायालयाच्या तळमजल्यावरील झेरॉक्स सेंटर परिसरात घडली. फिर्यादी अश्विनी उर्फ पल्लवी निखिल पाटील या सुनावणीसाठी न्यायालयात आल्या होत्या. त्यांनी पतीकडे घरगुती साहित्याची मागणी केल्यानंतर वाद निर्माण झाला. फिर्यादीनुसार, काजल शेळके यांनी जातीवाचक शिवीगाळ करत अश्विनी पाटील यांना मारहाण केली. या मारहाणीत त्यांच्या गालातून रक्तस्राव झाल्याचे नमूद करण्यात आले आहे. तसेच घटनास्थळी उपस्थित इतर वकिलांनीही फिर्यादीला धमकावत जातीवाचक शिवीगाळ केल्याचा आरोप आहे. तिला जबरदस्तीने बाहेर काढण्याचा आणि उलट तिच्याविरोधातच गुन्हा दाखल करण्याचा दबाव टाकण्यात आल्याचेही तक्रारीत म्हटले आहे. या प्रकरणी मनिषा सातपुते, साक्षी निकम, हर्षा खंडेलवाल, संदीप चौगुले, व्ही.आर. पाटील, संदीप देशपांडे, नारायण भांदिगरे, विवेक घाटगे, सुरज भोसले, स्वाती तानवडे, तृप्ती किनरे, विद्या देशमुख, जे.जे. देसाई आणि शिल्पा सुतार यांच्यासह एकूण १५ जणांवर गुन्हा दाखल करण्यात आला आहे. सध्या या प्रकरणाचा पुढील तपास शाहूपुरी पोलीस करत आहेत. न्यायालय परिसरातच अशी घटना घडल्याने कायदा व सुव्यवस्थेबाबत गंभीर प्रश्न उपस्थित झाले असून, या घटनेची राज्यभरात चर्चा सुरू झाली आहे.