सैफ अली खानच्या मणक्यातून काढला चाकूचा तुकडा; शस्त्रक्रियेनंतर डॉक्टरांनी दिली हेल्थ अपडेट

 Saif Ali Khan Attack |  बॉलिवूड अभिनेता सैफ अली खानच्या मुंबईतील वांद्रे येथील घरात घुसून त्याच्यावर एका अज्ञात व्यक्तीने चाकूने हल्ला केला. या हल्ल्यानंतर त्याला तातडीने लीलावती रुग्णालयात दाखल करण्यात आले. बुधवारी रात्री 2 वाजता चोरट्याने घरात घुसून सैफ अली खानवर धारदार शस्त्राने हल्ला केला.

या हल्ल्यात त्याच्यावर एकूण सहा वार करण्यात आले. यात सैफच्या मानेवर आणि पाठीवर मोठी जखम झाल्याची माहिती आहे. नुकतेच त्याच्यावर शस्त्रक्रिया पार पडली. यासंदर्भत लिलावती रुग्णालयातील डॉ. निरज उत्तमानी आणि न्यूरोसर्जन डॉ. नितीन डांगे यांनी बुधवारी पत्रकार परिषद घेऊन सैफ अली खानच्या प्रकृतीबाबत अपडेट दिली आहे.

डॉक्टरांनी दिली महत्त्वाची माहिती 

सैफ अली खान याच्यावर न्यूरोसर्जरी आणि प्लॅस्टिक सर्जरीची शस्त्रक्रिया करण्यात आली. आता त्याला अतिदक्षता कक्ष अर्थात ICU मध्ये हलवण्यात आले आहे. त्याला एका दिवसासाठी डॉक्टरांच्या निगराणीखाली ठेवण्यात येणार आहे. त्यानंतर पुढील निर्णय घेतला जाईल. सैफला दोन खोल जखमा, दोन मध्यम स्वरुपाच्या जखमा झाल्या आहेत. काही ठिकाणी चाकूने खरचटले आहे. आम्ही शस्त्रक्रिया करुन त्याच्या मणक्यातून अडीच इंचाचा चाकूचा तुकडा मणक्याच्या भागातून बाहेर काढला आहे. सध्या सैफ अली खानची प्रकृती स्थिर असून तब्येत वेगाने सुधारत आहे, अशी माहिती डॉ. निरज उत्तमानी यांनी दिली.

#WATCH | On the health condition of Actor Saif Ali Khan, Dr Nitin Dange of Lilavati Hospital says,” Saif Ali Khan was admitted to the hospital at 2 am with alleged history of assault by some unknown person. He sustained a major injury to the thoracic spinal cord due to a lodged… pic.twitter.com/Fi9v9BHf3i

— ANI (@ANI) January 16, 2025

न्यूरोसर्जन डॉ. नितीन डांगे यांनी दिलेल्या माहितीनुसार, सैफ अली खान याला काल रात्री 2 वाजता लिलावती रुग्णालयात जखमी अवस्थेत दाखल करण्यात आले. शस्त्रक्रिया करुन त्याच्या मणक्यातील चाकूचा तुकडा बाहेर काढण्यात आला आहे. तसेच स्पायनल फ्लुएडचं लीकेज थांबवण्यासाठी उपचार करण्यात आले. सैफ अली खानच्या हातावर, मानेवरचे घाव प्लॅस्टिक सर्जरीची शस्त्रक्रिया करुन पूर्ववत करण्यात आले आहेत, अशी माहिती न्यूरोसर्जन डॉ. नितीन डांगे यांनी दिली.

 नेमकं काय घडलं? 

दरम्यान, बुधवारी रात्री अभिनेता सैफ अली खानच्या घरात एक अज्ञात माणूस घुसला, त्याने त्याच्या घरात काम करणाऱ्या गृहसेविकेबरोबर वाद घातला. नंतर सैफने हस्तक्षेप करून त्याला शांत करण्याचा प्रयत्न केला, तेव्हा त्याने सैफवर हल्ला केला. या घटनेत सैफ जखमी झाला आहे, पोलीस या प्रकरणाचा तपास करत आहेत.

या हल्ल्यात सैफच्या कुटुंबातील इतर सदस्य सुरक्षित आहेत. सध्या मुंबई पोलीस वेगाने या प्रकरणाचा तपास करत असून सैफ अली खानच्या घरी पोलिसांचे एक पथक पोहोचले आहे. सध्या हा हल्ला चोरीच्या हेतूने करण्यात आला की आणखी दुसऱ्या कारणामुळे याचा पोलिसांकडुन शोध घेतला जात आहे.

हेही वाचा: 

Viratanushka : वीरनुष्काने शेअर केली अलिबागमधील नव्या घराची पहिली झलक; इतकी आहे किंमत