केंद्रीय गृहमंत्री अमित शहा यांच्याकडून खर्गेंचा समाचार
नवी दिल्ली : संरक्षणमंत्री राजनाथ सिंह यांनी केलेल्या राफेलच्या पुजनानंतर देशात एका वेगळ्याच मुद्यावर चर्चा होताना दिसत आहे. त्यातच मल्लिकार्जुन खर्गे यांनी यावर टीका करत अशा प्रकारच्या तमाशाची गरज नाही. जेव्हा आम्ही बोफोर्स तोफ भारतात आणली होती, तेव्हा अशा प्रकारचा दिखावा केला नव्हता असे म्हटले होत. आता यावर केंद्रीय गृहमंत्री अमित शहा यांनी खर्गेंवर निशाणा साधला आहे. खर्गेंना भारताच्या नाही तर इटलीच्या संस्कृतीबाबत अधिक माहिती असल्याचे सांगत शहा यांनी टोला लगावला.
राफेलच्या शस्त्र पूजेचा तमाशा करण्याची काय गरज होती? असे वक्तव्य खर्गे यांनी केले. परंतु त्यात त्यांचा काही दोष नाही. त्यांना भारताच्या संस्कृतीची नाही तर इटलीच्या संस्कृतीची अधिक माहिती आहे, असे शहा यावेळी म्हणाले. कॉंग्रेसला हवाई दलाचे आधुनिकीकरण व भारतीय परंपरांचा त्रास होतो. जो पक्ष क्वात्रोचीची पूजा करतो त्याच्यासाठी स्वाभाविकच शस्त्रपूजा ही अडचण असणार, खर्गेजी आम्हाला बोफर्स घोटाळ्याची आठवण करून दिल्याबद्दल धन्यवाद असे भाजपाकडून करण्यात आलेल्या ट्विटमध्ये म्हटले होते.
मंत्रिमंडळाच्या बैठकीनंतर माहिती आणि प्रसारण मंत्री प्रकाश जावडेकर यांनीदेखील आपली प्रतिक्रिया दिली. कॉंग्रेसबद्दल काय बोलावे. प्रत्येक देशाची आपली एक परंपरा असते आणि ते आपापल्या परीने त्या पार पाडत असतात. भारतात विजयादशमीच्या दिवशी शस्त्रपूजनाची परंपरा आहे, असेही त्यांनी म्हटले. तर कॉंग्रेस नेते संजय निरूपम यांनीदेखील खर्गे यांना घरचा अहेर दिला होता. शस्त्रपूजा कधी तमाशा होऊ शकत नाही. देशात याची फार जुनी परंपरा आहे. मात्र अडचण अशी आहे की खर्गेजी हे नास्तिक आहेत, पण कॉंग्रेस पक्षातील सर्वचजण काही नास्तिक नाहीत, असे ते म्हणाले होते.