Accident News : कर्नाटकातील विजयपूर जिल्ह्यातील सिंदगीजवळ आज अंगावर काटा आणणारी भीषण दुर्घटना घडली. सरकारी बस आणि दुचाकी यांच्यात झालेल्या जोरदार धडकेनंतर बसने अचानक पेट घेतल्याने एक तरुण जिवंत जळून मृत्युमुखी पडला. या घटनेमुळे परिसरात खळबळ उडाली आहे. मिळालेल्या माहितीनुसार, सिंदगी तालुक्यातील कन्नोळी टोलगेट परिसरात समोरून येणाऱ्या दुचाकी आणि बसमध्ये जोरदार धडक झाली. या अपघातात देवऱ्हिप्परगी तालुक्यातील मुळसावळगी गावचा रहिवासी अभिषेक सायबागौडा नागराळ (वय २२) हा युवक गंभीररीत्या जखमी झाला. मात्र धडकेनंतर दुचाकीच्या पेट्रोल टँकचा स्फोट होऊन भीषण आग लागली आणि तो आगीच्या ज्वाळांमध्ये अडकून जिवंत जळाला. धडकेची तीव्रता इतकी मोठी होती की काही क्षणांतच बसलाही आग लागली. त्यामुळे घटनास्थळी भीतीचे वातावरण निर्माण झाले. मात्र चालकाच्या प्रसंगावधानामुळे आणि प्रवाशांच्या तत्काळ प्रतिसादामुळे बसमधील सर्व प्रवाशांनी वेळेत बाहेर पडत आपले प्राण वाचवले. त्यामुळे मोठी जीवितहानी टळली. घटनेची माहिती मिळताच सिंदगी अग्निशामक दल तातडीने घटनास्थळी दाखल झाले आणि त्यांनी आगीवर नियंत्रण मिळवले. दरम्यान, पोलिसांनी घटनास्थळी पंचनामा करून पुढील तपास सुरू केला आहे. या भीषण अपघातामुळे स्थानिक नागरिकांमध्ये हळहळ व्यक्त केली जात असून, रस्ते सुरक्षेबाबत पुन्हा एकदा प्रश्नचिन्ह निर्माण झाले आहे.
