Firecracker Blast : आंध्र प्रदेश मधील काकीनाडा येथे फटाक्यांच्या कारखान्यात भीषण स्फोट होऊन १८ जणांचा मृत्यू झाल्याची धक्कादायक घटना समोर आली आहे. या दुर्घटनेत अनेकजण गंभीररित्या होरपळले असून परिसरात भीतीचे वातावरण निर्माण झाले आहे. ही घटना काकीनाडा जिल्ह्यातील पेड्डापुरम परिसरातील समलकोट मंडळातील वेतलापलेम गावात घडली. स्थानिकांच्या माहितीनुसार, आग लागण्यापूर्वी मोठ्या स्फोटांचे आवाज ऐकू आले. स्फोटाच्या वेळी कारखान्यात कामगार उपस्थित होते, त्यामुळे जीवितहानी वाढल्याचे सांगितले जात आहे. घटनेची माहिती मिळताच अग्निशमन दलाची पथके तात्काळ घटनास्थळी दाखल झाली असून आग नियंत्रणात आणण्यासाठी प्रयत्न सुरू आहेत. पोलिसांनीही घटनास्थळी धाव घेत जखमींना तातडीने जवळच्या रुग्णालयात दाखल केले आहे. मृतांचे मृतदेह ताब्यात घेऊन शवविच्छेदनासाठी पाठवण्यात आले आहेत. स्फोटाचे नेमके कारण अद्याप स्पष्ट झाले नसून प्रशासनाकडून चौकशी सुरू करण्यात आली आहे. या दुर्घटनेमुळे परिसरात मोठी खळबळ उडाली आहे.