गुना (मध्य प्रदेश) – कॉंग्रेस नेत्यांनी बऱ्या बोलाने भाजप मध्ये सामिल व्हावे अन्यथा त्यांच्यावर बुलडोजर कारवाई केली जाईल त्यासाठी त्यांनी तयार राहावे अशी अजब धमकी मध्य प्रदेशचे मंत्री महेंद्रसिंग सिसोदिया यांनी दिली आहे. त्यांच्या वक्तव्याचा व्हिडीओ सोशल मिडीयावरून मोठ्या प्रमाणात व्हायरल झाला असून त्यातून मोठा वाद निर्माण झाला आहे. तथापि आपल्या वादग्रस्त वक्तव्यांचे सिसोदिया यांनी समर्थनच केले आहे. सिसोदिया यांनी राघोगढ नगर पालिका निवडणुकीसाठी आयोजित केलेल्या प्रचारादरम्यान एका मेळाव्याला संबोधित करताना हे वादग्रस्त वक्तव्य केले आहे.
भाजपशासित इतर काही राज्यांप्रमाणेच मध्य प्रदेशातही बुलडोझर जस्टिसचा मोठ्या प्रमाणावर वापर केला जात आहे. शिवराज सिंह चौहान यांच्या नेतृत्वाखालील प्रशासन विविध गुन्ह्यांचा आरोप असलेल्या लोकांच्या बांधकामांवर आणि घरांवर बुलडोजर फिरवत आहे. त्यामुळे मध्यप्रदेशात सध्या मुख्यमंत्री चौहान यांना बुलडोजर मामा म्हणून ओळखले जाऊ लागले आहे.
मंत्र्यांच्या या वक्तव्यावर निशाणा साधत कॉंग्रेसचे मीडिया विभागाचे प्रभारी के के मिश्रा यांनी ट्विटरवर म्हटले आहे की, पंचायत मंत्री महेंद्र सिंह सिसोदिया यांनी राघोगडमधील कॉंग्रेसजनांना भाजपमध्ये सामील व्हा नाहीतर 2023 नंतर बुलडोझर तयार आहे असे म्हटले आहे, मात्र मंत्र्यांनी हे लक्षात घ्यावे की आम्ही ब्रिटीशांशी लढून त्यांना पळवून लावले आहे.
तुमचा बुलडोजर ब्रिटीशांपेक्षा मोठा नाही. कोणी काहीही म्हटले तरी मध्यप्रदेशात सत्तांतर अटळ असून या वर्षी कॉंग्रेसचेच सरकार सत्तेवर येईल असा दावाही त्यांनी केला आहे. या निवडणुकीत भाजपला 50 पेक्षा अधिक जागा मिळाल्यातर आम्ही तोंड काळे करू असे विधान कॉंग्रेस नेते फूलसिंग बरैया यांनी केले आहे.