सांगवी – महापालिकेच्या “ह’ क्षेत्रीय कार्यालयात आयोजित जनसंवाद सभेत नागरिकांच्या प्रश्नांकडे दुर्लक्ष होत आहे. भाजपाच्या माजी नगरसेवकांचा पारा चढल्याने त्यांनी महापालिका मुख्य समन्वय अधिकारी व प्रशासन अधिकाऱ्यांना चांगलेच फैलावर घेतले. नेहमीप्रमाणे सोमवारी सकाळी दहा ते बारा वाजेपर्यंत जनसंवाद सभा पार पडली. एकूण आठ तक्रारी अर्ज दाखल झाले होते.
या वेळी सभेला मुख्य समन्वय अधिकारी पर्यावरण विभाग सहशहर अभियंता संजय कुलकर्णी, क्षेत्रीय अधिकारी विजयकुमार थोरात, स्थापत्य कार्यकारी अभियंता अनिल राऊत, स्थापत्य अभियंता विजयसिंह भोसले आदी विभागातील अधिकारी वर्ग या प्रसंगी उपस्थित होते. नागरिकांनी विचारलेल्या प्रश्नांमध्ये दापोडी येथील सुंदरबागमधील उच्चभ्रू, सुशिक्षित नागरिकांनी माजी नगरसेविका यांच्यासोबत एकत्रित येऊन भर जनसंवाद सभेमध्ये समन्वय अधिकाऱ्यांना प्रश्नांचा पाडा वाचला. येथील सुंदरबागमधील रस्त्याचे काम गेली काही दिवस रखडले आहे. पावसाळा सुरू झाला आहे.
अर्धवट रस्त्याच्या कामकाजामुळे नागरिक, ज्येष्ठ नागरिक कसरत करून चालताना पडत आहेत. येथील रस्त्यातील वीज केबल कामकाज सुरू असताना तुटल्या. त्या केबल तात्पुरत्या स्वरूपात जोडण्यात आल्या. एखादे जड वाहन जोडण्यात आलेल्या केबलवरून गेल्यास वीज गायब होत आहे. गेली सहा दिवस नागरिक अंधारात आहेत. महावितरणला अनेकदा तक्रार करूनही कोणीही दाद देत नाहीत. असे मुख्य समन्वय अधिकाऱ्यांकडे आपली तक्रार करीत असताना दिसून आले.
जनसंवाद सभेला सांगवी, पिंपळे गुरव, दापोडी प्रभागातील माजी नगरसेवक, माजी नगरसेविका, नागरिक, जनसंवाद सभेला तक्रारी घेऊन उपस्थित होते. नवी सांगवी येथील साई चौकात रस्त्याचे अर्धवट काम, एम के हॉटेल चौकातील शौचालय काढून त्या जागी सुशोभीकरण करून ज्येष्ठांसाठी वाचनालय उभारावे. जुनी सांगवी येथील पवारनगर गल्ली नंबर 2 मध्ये रस्त्याचे अर्धवट काम त्वरित पूर्ण करणे, पिंपळे गुरव येथील त्रिमूर्ती चौक ते शिवराम नगर येथील रस्त्याच्या कडेला असणारी स्वच्छता करणे आदी तक्रारी उपस्थित करण्यात आल्या. या वेळी मुख्य समन्वय अधिकारी यांच्याकडून तक्रारींचे निराकरण करण्यात आले.
जुनी सांगवी येथील गर्दीच्या ठिकाणी नो पार्किंग फलक लावण्यात यावेत. माकन चौक येथे पांढरे पट्टे, दुभाजक करण्यात यावे. पवारनगर गल्ली नंबर 2 येथील गेली अनेक दिवस रस्त्याचे काम खोळंबले आहे. पावसाळ्यात नागरिकांना नाहक त्रास सहन करावा लागत आहे. तत्काळ नियोजित काम कधी पूर्ण होणार तेवढे अधिकाऱ्यांनी सांगावे.
– संतोष कांबळे, माजी नगरसेवक
दापोडी येथील सुंदर बाग रोडचे अर्धवट काम रखडले आहे. त्याला त्वरित गती देऊन डांबरीकरण अथवा सिमेंट कॉंक्रिटीकरण करून देण्यात यावे. नागरिकांना याचा नाहक त्रास सहन करावा लागत आहे. नागरिक सातत्याने समस्यांविषयी तक्रारी करत आहेत. परंतु प्रशासनाकडून दखल घेतली जात नाही.
– स्वाती काटे, माजी नगरसेविका.
===============