Police Suspension : जळगाव जिल्ह्यातील बोदवड येथे घडलेल्या अन्सार पिंजारी हत्या प्रकरणानंतर पोलीस प्रशासनात मोठी खळबळ उडाली आहे. या प्रकरणात कर्तव्यात हलगर्जीपणा आणि निष्काळजीपणा केल्याचा ठपका ठेवत श्रीकांत धिवरे यांनी दोन पोलीस अधिकारी आणि एका कर्मचाऱ्याला तडकाफडकी निलंबित केले आहे. (Police Suspension) या कारवाईत सहाय्यक पोलीस निरीक्षक दीपक सुरवडकर, सहाय्यक पोलीस उपनिरीक्षक रवींद्र गुरचळ आणि हेड कॉन्स्टेबल नंदकिशोर धनके यांचा समावेश आहे. (Police Suspension) मिळालेल्या माहितीनुसार, काही दिवसांपूर्वी अन्सार पिंजारी यांच्या घरी चोरी झाली होती. या प्रकरणात त्यांनी काही व्यक्तींवर संशय व्यक्त केला होता. मात्र, संबंधित संशयितांविरुद्ध पोलिसांनी वेळीच प्रतिबंधक कारवाई केली नाही, असा गंभीर आरोप करण्यात आला आहे. (Police Suspension) चोरीच्या घटनेनंतर परिसरात तणाव निर्माण होण्याची शक्यता असतानाही कायदा व सुव्यवस्था राखण्यात संबंधित अधिकाऱ्यांनी हलगर्जीपणा केल्याचा ठपका चौकशीत ठेवण्यात आला. यानंतर जिल्हा पोलीस अधीक्षकांनी तातडीने निलंबनाची कारवाई केली. (Police Suspension) दरम्यान, चोरीच्या संशयावरून निर्माण झालेल्या वादातूनच अन्सार पिंजारी यांची निर्घृण हत्या करण्यात आल्याचे समोर आले आहे. या घटनेनंतर बोदवड परिसरात संतापाची लाट उसळली होती. “पोलिसांनी वेळेत योग्य पावले उचलली असती तर ही हत्या टळू शकली असती,” अशी चर्चा स्थानिक नागरिकांमध्ये सुरू आहे. या प्रकरणामुळे जळगाव पोलीस दलाच्या कार्यपद्धतीवर प्रश्नचिन्ह निर्माण झाले असून, प्रशासनाने या घटनेची गंभीर दखल घेत कठोर कारवाईचा संदेश दिला आहे. (Police Suspension)