मुंबई : भारतरत्न लता मंगेशकर यांना करोना आणि न्यूमोनियाची लागण झाल्यानंतर त्यांना मुंबईच्या ब्रीच कॅन्डी रुग्णालयात दाखल करण्यात आले. सध्या त्यांच्यावर उपचार सुरू असून त्यांना आयसीयूमध्ये ठेवण्यात आले आहे. त्यांच्या प्रकृतीत सुधारणा व्हावी यासाठी देशभरातून प्रार्थना करण्यात येत आहे. आता त्यांच्यावर उपचार करणाऱ्या डॉक्टरांनी त्यांच्या प्रकृती विषयी माहिती दिली आहे.
लता मंगेशकर या अजूनही आयसीयू वॉर्डमध्ये आहेत आणि आम्ही त्यांच्या प्रकृतीवर लक्ष ठेवून आहोत. वय अधिक असल्यामुळे त्यांना रिकव्हर होण्यासाठी वेळ लागेल, अशी माहिती लता मंगेशकर यांच्यावर उपचार करणारे डॉक्टर प्रतित समदानी यांनी दिली आहे.
गुरुवारी १३ जानेवारीला डॉक्टरांनी दिलेल्या माहितीनुसार, लता मंगेशकर यांच्या प्रकृतीत थोडीशी सुधारणा होत आहे. लता मंगेशकर यांच्यावर उपचार करत असलेले डॉ. प्रतित समदानी म्हणाले, “त्या अजूनही आयसीयू वॉर्डमध्ये आहेत. पण त्यांच्या तब्येतीत थोडी सुधारणा झाली आहे.”
सूत्रांनी दिलेल्या माहितीनुसार, लता मंगेशकर यांना सध्यातरी कोणत्याही व्हेंटिलेटर सपोर्टची गरज नाही. लता मंगेशकर या ब्रीच कॅण्डी रुग्णालयातील डी वॉर्डमध्ये दाखल आहेत. त्या वॉर्डातील एका वरिष्ठ अधिकाऱ्यांच्या माहितीनुसार, लता मंगेशकर या काही इतर काही वैद्यकीय तपासणीसाठी रुग्णालयात आल्या होत्या. मात्र उपचारादरम्यान त्यांना करोनाची लागण झाली.
याआधीही नोव्हेंबर २०१९ मध्ये लतादीदींना श्वास घेण्यास त्रास होत असल्याने रुग्णालयात दाखल करण्यात आले होते. यावेळी त्यांना न्युमोनियाची लागण झाली होती. त्यावेळी त्यांना २८ दिवसांनी डिस्चार्ज देण्यात आला होता.