पावसाचा जोर मंदावला सखल भागातील पाणी ओसरू लागले
कराड – मंगळवारी रात्रीपासून पावसाचा जोर कमी झाल्याने शहरात शिरलेले पावसाचे पाणी बुधवारी पहाटेपासून हळूहळू ओसरू लागले, मात्र दुपारनंतर पुन्हा पावसाचा जोर वाढल्याने पुन्हा आहे तीच परिस्थिती निर्माण झाली आहे. महाबळेश्वर, नवजा या भागातही पावसाचा जोर काही प्रमाणात ओसरला आहे. त्यामुळे कोयना धरणातील पाण्याची आवक थोडी कमी होऊ लागली आहे.
सकाळी अकरा वाजता धरणाचे वक्र दरवाजे 16 फुटांवरून 14 फुटांवर करण्यात आले आहेत. गेले दोन दिवसांच्या तुलनेत आज पहाटेपासून पाऊस कमी झाला आहे. त्यामुळे शहरातील पुराच्या पाण्याची पातळी दुपारी दोन वाजता पाच फुटाने कमी झालेली आहे. पूर ओसरत आहे, त्यामुळे लोकांनी कोणत्याही अफवांना बळी पडू नये, असे आवाहन प्रांताधिकारी हिम्मत खराडे यांनी केले आहे.
कराड शहरात कृष्णा, कोयनाचा संगम असल्यामुळे पाणी मोठ्या प्रमाणात एकत्र आले होते. या पाण्याने मंगळवारी रात्री दत्त चौकातील छत्रपती शिवाजी महाराजांच्या पुतळ्याला वेढा दिला होता. पण पहाटेपासून येथील पाणी ओसरू लागले असून दत्त चौकातील सर्व पाणी कमी झाले आहे. कोयना, धोम, या धरणाचे पाणी मोठ्या प्रमाणात अनुक्रमे कोयना आणि कृष्णा नद्यांमध्ये विसर्ग करावे लागत आहे. आता पावसाचा जोर कमी झाल्यामुळे कोयना धरणाचे दरवाजे दोन फुटांनी कमी केले आहेत. त्यामुळे पूर हळूहळू कमी होत आहे.
गेली चार दिवसांपासून कराड शहरात पुराची भयंकर स्थिती निर्माण झाल्याने नदीकाठच्या घरे व झोपडपट्ट्यातील कुटुंबांना सुरक्षित स्थळी हलवण्यात आले होते. या कुटुंबाची पालिकेकडून योग्य ती काळजी घेतली जात आहे. यामध्ये पाटण कॉलनीमधील 65 कुटुंबातील 280 सदस्यांना प्राथमिक शाळा क्रमांक 3 मध्ये ठेवण्यात आले आहे. तसेच सोमवार पेठेतील कुंभार पाणवठा येथील 18 कुटुंबातील 49 सदस्यांना शाळा क्रमांक 9 मध्ये हलविण्यात आले आहे. सटवाई मंदिर शुक्रवारपेठ येथील सहा कुटुंबांना शाळा क्रमांक 11 मध्ये स्थलांतरित केले आहे. लल्लुभाई चाळ, शनिवार पेठ येथील शाळा क्रमांक 3 मध्ये एका कुटुंबाला स्थलांतरित केले आहे.
सोमवार पेठेतील गोंधळी घरासमोरील चार कुटुंबातील 23 जणांना कृष्णाई मंगल कार्यालयात ठेवण्यात आले आहे. तसेच मुजावर वाड्यातील 25 कुटुंबातील 111 जणांना याच कार्यालयात ठेवले आहे. वाखाण भागातील रुक्‍मिणीनगर येथील सतरा कुटुंबातील 80 लोकांना प्राथमिक शाळा क्रमांक 10 मध्ये ठेवले आहे.
पत्रा चाळीतील कुटुंबांना पालकर शाळेत पाठवले आहे. दूध कॉलनीतील 16 कुटुंबातील 65 जणांना 7 व 12 शाळेत शिफ्ट केले असून नगरपालिकेने कराड शहर मधील 155 कुटुंबे स्थलांतरित केली आहेत. यातील 652 सदस्यांना त्या-त्या परिसरातील प्राथमिक शाळा किंवा मंगल कार्यालयामध्ये शिफ्ट केले आहे. येथील सर्वांना नगरपालिका व शहरातील दानशूर व्यक्तींकडून मूलभूत सुविधा पुरवल्या जात आहेत.
-कराड नगरपालिकेचे पदाधिकारी, अधिकारी व कर्मचारी 100 तासांहून अधिक पुरग्रस्तांच्या मदतीला
-रात्रभर पालिकेच्या आरोग्य कर्मचाऱ्यांनी उचलला कचरा
-दत्त चौकासह परमार लाइट जवळचे पाणी कमी झाले
-यशवंत हायस्कूल जवळचे पाणी 15 ते 20 फूट मागे सरकले
-पंताच्या कोटाखालील
-रस्ता पूर्ववत सुरू
-सांगवड पुलाजवळचे
-पाणी ओसरले
-नाडे-ढेबेवाडी रस्ता
-वाहतूक सुरू
-रात्री पाऊस थांबल्याने
-पूर थोडासा ओसरला
-पहाटेपासून पावसाला
-पुन्हा सुरुवात
-जगदंब ढोल ताशा झांज पथक कराड यांच्या तर्फे आपत्कालीन व्यवस्थापनासाठी कार्य करणाऱ्या पोलीस मित्रांसाठी तसेच नगरपालिका कर्मचाऱ्यांसाठी मोफत चहा बिस्किटांचे वाटप करण्यात आले
वाठार नजीक महामार्गावर रस्त्यावर पाणी साचल्याने एक लेनवरुन एस. टी. व प्रवासी वाहतुकीसाठी खुली करण्यात आली आहे
-नवीन कृष्णा पुलावरून वाहतूक सुरू
