तेहरान : इराणमध्ये सध्या हिजाब विरोधी आंदोलने पुकारण्यात आले आहे. महिलांकडून हिजाबला विरोध करत निदर्शने करण्यात येत आहेत. या दरम्यान आता इराणच्या राष्ट्रपतींच्या एका कृतीमुळे जगाचे लक्ष वेधून घेतले आहे. एका अमेरिकन महिला न्यूज अँकरने हिजाब घालण्यास नकार दिल्याने इराणच्या राष्ट्रपतींनी मुलाखत देण्यास नकार दिला असल्याची माहिती समोर आली आहे.
समोर आलेल्या माहितीनुसार, सीएएन वृत्तसंस्थेच्या महिला पत्रकार क्रिस्टीन एमनपोर यांनी दावा केला आहे की, हिजाब घालण्यास त्यांनी नकार दिल्याने इराणचे राष्ट्रपती इब्राहिम रईसी यांनी मुलाखतीची सर्व तयारी पूर्ण झाल्यानंतर मुलाखत देण्यास नकार दिला. इराणमध्ये हिजाबवर सध्या वातावरण तापलं आहे. याचा परिणाम इराणचे राष्ट्रपती इब्राहिम रईसी यांच्या अमेरिकेतील एका कार्यक्रमावर झाला आहे.
इराणचे राष्ट्रपती इब्राहिम रईसी यांनी मुलाखत घेण्यासाठी अमेरिकन महिला न्यूज अँकरसमोर हिजाब घालण्याची अट घातली होती, मात्र महिला अँकरने हिजाब घालण्यास नकार दिला. त्यामुळे मुलाखतीसाठीची सर्व तयारी पूर्ण होऊनही इराणचे राष्ट्रपती इब्राहिम रईसी यांनी मुलाखत देणे नाकारले. न्यूज अँकर क्रिस्टीन एमनपोर यांनी दावा केलाय की त्या इराणचे राष्ट्रपती इब्राहिम रईसी यांची मुलाखत घेऊ शकल्या नाहीत कारण त्यांनी हिजाब घालण्याची अट पूर्ण केली नाही.
इराणमध्ये सध्या हिजाबविरोधी निदर्शने करण्यात येत आहेत. पोलिसांच्या अटकेत एका महिलेचा मृत्यू झाल्यानं महिलांनी आक्रमक भूमिका घेत आंदोलनं करण्यास सुरुवात केली. इराणमध्ये हिजाब न घातल्यानं एका महिलेला अटक करण्यात आली होती. त्या महिलेचा पोलीस कोठडीत मृत्यू झाला. पोलिसांच्या अटकेत असताना महसा अमिनीचा मृत्यू झाला. यानंतर इराणमधील महिलांना आंदोलने करण्यास सुरुवात केली.
महिलांकडून इराणमध्ये ठिकठिकाणी आंदोलनं सुरु आहेत. महिलांकडून केस कापून आणि हिजाब जाळून निषेध करण्यात येत आहे. राष्ट्रपती इब्राहीम रईसी यांनी महसा अमिनी यांच्या मृत्यूबद्दल शोक व्यक्त केला. तर इराणमध्ये सुरु असलेल्या हिजाब विरोधी निदर्शनाला इराणच्या विरोधकांचा कट असल्याचे म्हटले आहे.