मुंबई – जागतिक क्रिकेटमधील मास्टर ब्लास्टर सचिन तेंडुलकरने आपल्या मुलाला आयपीएलमध्ये खेळताना पाहण्याची आशा राखली होती. त्याला गेल्या व यंदाच्या मोसमात मुंबई इंडियन्सने आपल्याकडे घेतलेही होते. मात्र, या दोन्ही मोसमांत अर्जुनला एकाही सामन्यात खेळवले गेले नाही. यावरून निराश झालेल्या अर्जुनला सचिनने सबुरीचा सल्ला दिला आहे. संघात स्थान मिळाले नाही म्हणून निराश होण्यापेक्षा आणखी मेहनत कर, कामगिरी व गुणवत्ता सिद्ध कर व बाकी निवडकर्त्यांवर सोड, असा सल्ला सचिनने मुलाला दिला आहे.
यंदाच्या मोसमात मुंबईची कामगिरी सुमार झाली होती. त्यांना सलग नऊ सामने गमवावे लागले होते. त्यामुळे उरलेल्या सामन्यांत तरी अर्जुनला संधी मिळेल असे म्हटले जात होतं. मात्र, मुंबई इंडियन्सचा कर्णधार रोहित शर्माने अर्जुनला एकाही सामन्यात खेळवले नाही. त्यावरून मुंबई क्रिकेट संघटनेतील राजकारणावर चर्चा घडत होत्या व पडद्यामागील कोणीतरी सचिनचे संघटनेतील वाढत्या वर्चस्वाला शह देण्यासाठीच रोहितच्या खांद्यावरून अर्जुनच्या माध्यमातून सचिनवर कोणीतरी निशाणा ठेवत असल्याचेही बोलले जात होते.
या सगळ्यात अर्जुन मात्र निराश झाला होता व त्याने आपली निराशा सचिनकडे व्यक्त केली होती, त्यावर सचिनने त्याला हा सल्ला दिला. तुझा मार्ग खूप खडतर आहे. त्यामुळे तुला आणखी मेहनत व सरस कामगिरी करावी लागणार आहे. भविष्याचा विचार करून जास्तीत जास्त सरस कामगिरी कशी होईल व त्यावरून निवड समिताला आपली दखल घेणे भाग पाडावे लागेल, असे सचिनने अर्जुनला सांगितले.