IPL 2026 : यंदा आयपीएल २०२६ (IPL 2026) मध्ये पहिल्यांदाच पिता-पुत्र एकमेकांच्या विरुद्ध मैदानात उतरणार आहेत. सचिन तेंडुलकर आणि त्यांचा मुलगा अर्जुन तेंडुलकर यांच्यातील ही लढत क्रिकेटप्रेमींसाठी खास ठरणार आहे. सचिन तेंडुलकर यांनी आता क्रिकेट खेळणे सोडले असले तरी ते मुंबई इंडियन्स संघाचे मेंटॉर (IPL 2026) म्हणून काम करत आहेत. तर अर्जुन तेंडुलकर हा लखनौ सुपर जायंट्स (LSG) संघात सामील झाला आहे. ट्रेडिंग विंडोद्वारे अर्जुनला लखनौने घेतले आहे. यापूर्वी २०२५ पर्यंत अर्जुन मुंबई इंडियन्सकडून खेळत होता, पण आता ही जोडी फुटली आहे आणि दोन्ही संघ एकमेकांसमोर उभे ठाकणार आहेत. कधी आणि कुठे होणार सामना? मुंबई इंडियन्स विरुद्ध लखनौ सुपर जायंट्स यांच्यातील हा सामना ४ मे २०२६ रोजी वानखेडे स्टेडियम, मुंबई येथे खेळवला जाणार आहे. हा सामना रात्री ७:३० वाजता सुरू होईल. क्रीडाप्रेमींना या ऐतिहासिक सामन्यासाठी अजून एक महिन्याची वाट पाहावी लागणार आहे. Sachin & Arjun Tendulkar अर्जुन तेंडुलकरची पार्श्वभूमी अर्जुन तेंडुलकरने २०२३ मध्ये मुंबई इंडियन्सकडून आयपीएलमध्ये डेब्यू केले होते. आतापर्यंत त्याने फक्त ५ आयपीएल सामने खेळले आहेत आणि त्यात ३ विकेट्स घेतल्या आहेत. तो मुख्यतः लेफ्ट आर्म पेस बॉलर म्हणून ओळखला जातो. ट्रेडिंगनंतर तो लखनौ सुपर जायंट्सकडे गेला आहे. लखनौ संघात मोहम्मद शमी, मयंक यादव, अवेश खान, मोहसिन खान सारखे तगडे गोलंदाज आहेत. त्यामुळे अर्जुनला प्लेइंग-११ मध्ये स्थान मिळेल का? याबाबत शंका व्यक्त केली जात आहे. मात्र अर्जुन सध्या पूर्वतयारीत जोरदार मेहनत करत असल्याचे दिसते. आयपीएल २०२६ ची सद्यस्थिती यंदा आयपीएल (IPL 2026) स्पर्धेला २८ मार्च २०२६ रोजी सुरुवात झाली असून, आतापर्यंत तीन सामने पार पडले आहेत. प्रत्येक पर्वात नवे विक्रम, चुरस आणि नाट्यमय क्षण पाहायला मिळतात. यंदाही गुणतालिकेत उलथापालथ होण्याची शक्यता आहे आणि प्रत्येक संघ जेतेपदासाठी शर्यतीत आहे. सचिन-अर्जुन यांच्यातील पिता-पुत्र सामना हा केवळ क्रिकेट सामना नसून, भावनिकदृष्ट्याही खूप महत्त्वाचा ठरणार आहे. सचिन मेंटॉर म्हणून मुंबई इंडियन्सला मार्गदर्शन करतील आणि अर्जुन लखनौकडून खेळेल. या सामन्यात अर्जुन प्लेइंग इलेव्हनमध्ये असेल की नाही, हे सध्या अनिश्चित आहे, पण क्रिकेट विश्वात या लढतीकडे सर्वांचे लक्ष लागले आहे.