सातारा : साताऱ्यात शंभर रुपयांच्या स्टॅम्पची कृत्रिम टंचाई निर्माण झाली होती. मात्र, राष्ट्रवादी कॉंग्रेस पक्षाच्या वैद्यकीय मदत कक्षाचे राज्य उपाध्यक्ष सागर भोगावकर यांनी आंदोलनाचा पवित्रा घेतल्यानंतर अधिकाऱ्यांनी सकारात्मक भूमिका घेऊन कृत्रिम टंचाई दूर केली.
सातार्यातील 100 रुपयांच्या स्टॅम्प टंचाईबाबत राष्ट्रवादी कॉंग्रेस पक्षाच्या वैद्यकीय मदत कक्षाचे राज्य उपाध्यक्ष सागर भोगावकर यांनी काल स्टॅम्प व्हेंडरांच्या शेजारी उभे राहून खातरजमा केली. त्यावेळी ही टंचाई फक्त कृत्रिम असल्याचे निदर्शनास आले. त्यांनी आंदोलनाचा पवित्रा घेताच उपजिल्हाधिकारी संजय पाटील यांनी स्टॅम्प व्हेंडरांना आपल्या दालनात बोलावून सक्त ताकीद दिली आहे. भोगावकर यांना त्यांच्या भ्रमणध्वनीवर काल दि. 12 रोजी अनेकांचे स्टॅम्प टंचाईबाबत फोन आले. त्याची खातरजमा करण्यासाठी त्यांनी तहसीलदार कार्यालय गाठले. त्यांनी पाहणी केली असता संबंधित स्टॅम्प व्हेंडर 100 रुपयांचे स्टॅम्प शिल्लक नसल्याचे बर्याच जणांना सांगून तसेच काही जणांकडून 50 रुपये जास्त घेऊन त्याची विक्री करताना आढळून आले.
भोगावकर यांना ही बाब खटकताच त्यांनी याबाबतची माहिती उपजिल्हाधिकारी संजय पाटील यांना दिली. तसेच सर्वसामान्यांच्या प्रश्नासाठी वेळ पडली तर आंदोलना करण्याचीही तयारी असल्याचे सांगितले. आंदोलनाच्या इशार्यानंतर उपजिल्हाधिकारी पाटील यांनी संबंधित स्टॅम्प व्हेंडरांना आपल्या दालनात बोलावून खडे बोल सुनावले. यानंतर सर्व स्टॅम्प व्हेंडरांनी सर्वसामान्यांना 100 रुपयांचे स्टॅम्प वितरित करण्यास सुरुवात केली. भोगावकर यांनी घेतलेल्या या भूमिकेमुळे सर्वसामान्यांच्या खिशाला लागणारी झळ वाचली आहे.
तर परवाना रद्द होईल : प्रांताधिकारी सुधाकर भोसले
सेल्फ अटेस्टेड असेल तर 100 रुपयांच्या स्टॅम्पला आमची कोणतीच आडकाठी नसल्याची प्रतिक्रिया यावेळी प्रांताधिकारी सुधाकर भोसले यांनी दिली आहे. जर कोणी 100 रुपयांचे स्टॅम्प देण्यासाठी गरजूची अडवणूक करत असेल तर वेळप्रसंगी त्यांचा परवाना रद्द करण्यात येईल, अशाही सक्त सूचना त्यांनी दिल्या आहेत.
