Instagram Cyber Fraud – इन्स्टाग्रामवर झालेली ओळख आणि परदेशातून पार्सल पाठवल्याचे आमिष दाखवत हडपसरमधील ४० वर्षीय महिलेची तब्बल ७ लाख १५ हजार रुपयांची सायबर फसवणूक करण्यात आल्याचा धक्कादायक प्रकार उघडकीस आला आहे. या प्रकरणी पुणे शहर सायबर पोलीस ठाण्यात गुन्हा दाखल करण्यात आला असून, पोलिसांनी तपास सुरू केला आहे. पोलिसांनी दिलेल्या माहितीनुसार, मीनल विलास साळवे (रा. हांडेवाडी रोड, हडपसर) यांची इन्स्टाग्रामवर “ॲलेक्स” नावाच्या व्यक्तीशी ओळख झाली होती. त्यानंतर दोघांमध्ये व्हॉट्सॲपवर नियमित चॅटिंग आणि कॉल सुरू होते. काही दिवसांनी आरोपीने इंडोनेशियातून महिलेसाठी पार्सल पाठवल्याचे सांगितले. त्यानंतर स्वतःला दिल्ली कस्टम विभागातील अधिकारी “ज्युतसोई” म्हणून सांगणाऱ्या महिलेने फिर्यादीशी संपर्क साधला. संबंधित पार्सल भारतात आले असून, त्यासाठी कस्टम शुल्क भरावे लागेल, असे सांगण्यात आले. सुरुवातीला ६० हजार रुपयांची मागणी करण्यात आली. मात्र, फिर्यादीने पैसे नसल्याचे सांगितल्यानंतर ती रक्कम ४३ हजारांवर आणण्यात आली. यानंतर फिर्यादीने फोनपे आणि नंतर एनईएफटीद्वारे आरोपींनी दिलेल्या खात्यांवर पैसे पाठवले. आरोपींनी पार्सलमध्ये कपडे, दागिने आणि डॉलरमध्ये मोठी रोख रक्कम असल्याचे सांगून ती भारतीय चलनात रूपांतरित करण्यासाठी आणखी पैसे भरण्याचा दबाव टाकला. याप्रकारे फिर्यादीकडून एकूण ७ लाख १५ हजार रुपये उकळण्यात आले. पैसे भरल्यानंतर संबंधित “कस्टम अधिकारी” आणि “ॲलेक्स” यांचे फोन बंद लागल्याने आपली फसवणूक झाल्याचे महिलेच्या लक्षात आले. त्यानंतर त्यांनी तातडीने 1930 या सायबर हेल्पलाईनवर संपर्क साधून, ऑनलाइन तक्रार नोंदवली. या प्रकरणी सायबर पोलीस स्टेशनमध्ये गुन्हा दाखल करण्यात आला आहे. सायबर पोलिसांनी संबंधित बँक खातेधारक, मोबाईल नंबर आणि व्यवहारांचा तपास सुरू केला असून, नागरिकांनी सोशल मीडियावरील अनोळखी व्यक्तींवर विश्वास ठेवू नये, तसेच ‘परदेशातून गिफ्ट/पार्सल’च्या नावाखाली पैसे मागितल्यास सतर्क राहावे, असे आवाहन करण्यात आले आहे.