सातारा : शहरातील पोवई नाका परिसरात उभारण्यात येत असलेल्या लोकनेते बाळासाहेब देसाई यांच्या स्मारकाच्या कामाची पाहणी माजी मंत्री आ. शंभूराज देसाई यांनी गुरुवारी दुपारी केली. पुढील दोन महिन्यांत स्मारकाचे काम पूर्ण होईल, असा विश्वास त्यांनी यावेळी व्यक्त केला.
लोकनेते बाळासाहेब देसाई यांच्या स्मारकाचे काम पोवई नाका परिसरामध्ये सुरु आहे. या कामाची सद्यस्थिती पाहण्यासाठी शंभूराज देसाई येथे आले होते. देसाई म्हणाले, या स्मारकाच्या म्युरलचे काम ज्या व्यक्तीकडे देण्यात आले होते ती व्यक्ती आजारी असल्यामुळे ते संथ गतीने सुरू आहे.
त्यामुळे हे काम दुसऱ्याकडून करण्याच्या सूचना मुख्याधिकारी बापट यांना केल्या आहेत, असे त्यांनी सांगितले. यामध्ये निधीची कोणतीच अडचण नाही.कारण पालकमंत्री असतानाच निधीची तरतूद केली असल्याचे त्यांनी सांगितले.
पुढील दोन महिन्यांत या स्मारकाचे पूर्ण काम होईल असेही त्यांनी सांगितले. यावेळी जिल्हाधिकारी जितेंद्र डुडी, जिल्हा परिषदेच्या मुख्य कार्यकारी अधिकारी याशनी नागराजन, पोलीस अधीक्षक समीर शेख, नगरपालिकेचे मुख्याधिकारी अभिजित बापट यांच्यासह विविध विभागांचे अधिकारी उपस्थित होते.
