पुणे – शहर परिसरात गेल्या आठवडाभरापासून सातत्याने तापमानात वाढ होत आहे. त्याचबरोबर दिवसा उकाडा आणि रात्री गारवा असे संमिश्र वातावरण आहे. आगामी दोन ते तीन दिवस वातावरणाची हीच स्थिती कायम राहील, असा इशारा हवामान विभागाने दिला आहे.
राजस्थानलगतच्या भागात हवेची चक्रीय स्थिती कार्यरत आहे. तर येत्या 24 तासांमध्ये उत्तर-पश्चिम किनारपट्टीलगत नव्याने कमी दाबाचा पट्टा निर्माण होण्याची शकयता आहे. या स्थितीच्या प्रभावामुळे राज्यातील कमाल तापमानात सातत्याने वाढ होत असून, किमान तापमान देखील सरासरीपेक्षा जास्त असल्याची नोंद विभागाने घेतली आहे. परिणामी शहर परिसरात दिवसा उन्हाचा कडाका वाढला असून, सायंकाळी मात्र हवेत गारवा जाणवत आहे.
आगामी दोन ते तीन दिवसांत शहरातील किमान तापमानात दोन ते तीन अंशानी वाढ होईल, अशी शक्यता विभागातर्फे वर्तविण्यात आली आहे. शहर परिसरात सोमवारी (दि.7) किमान तापमान 12.9 अंश सेल्सिअस तर कमाल तापमान 32.6 अंश सेल्सिअस इतकी नोंदविण्यात आली. सरासरीपेक्षा तापमानात एक अंशानी वाढ झाली आहे.