नवी दिल्ली : देशात कोरोनाचा फैलाव वाढण्यासाठी कारणीभूत ठरलेला दिल्लीचा कार्यक्रम आता केंद्रीय गृहमंत्रालयाच्या रडारवर असल्याचे सांगण्यात येत आहे. त्याच पार्श्वभूमीवर आता गृहमंत्रालयाने सर्व राज्यांना निर्वासित मुस्लीम रोहिंग्यांची माहिती मिळवत त्यांची वैद्यकीय तपासणी करण्याचा आदेश दिला आहे. रोहिंग्या तबलिगी जमातच्या सदस्यांच्या संपर्कात आल्याचा संशय असल्याने केंद्रीय गृह मंत्रालयाकडून हा आदेश देण्यात आला आहे.
गृहमंत्रालयाने सर्व राज्य आणि केंद्रशासित प्रदेशांना पत्र लिहिले असून रोहिंग्या आणि तबलिगी जमातमधील संबंधांचा तपास करण्यास सांगितले आहे. सोबतच रोहिंग्या मुस्लीम आणि त्यांच्यांशी संबंधित लोकांची करोना चाचणी करण्यासही सांगितले आहे. यासंबंधी गरज असलेली सर्व पावले उचला असा आदेश गृहमंत्रालयाकडून देण्यात आला आहे. एका वृत्तसंस्थेने यासंबंधी वृत्त दिले आहे.
केंद्रीय गृहमंत्रालयाकडून राज्यांचे पोलीस प्रमुख आणि मुख्य सचिवांना पाठवण्यात आलेल्या पत्रात सांगण्यात आलं आहे की, “रोहिंग्या मुस्लिमांनी तबलिगी जमातच्या इज्तिमा आणि इतर धार्मिक कार्यक्रमात सहभाग घेतल्याची माहिती मिळत आहे. यामुळे त्यांना करोनाची लागण झाली असल्याचा संशय आहे”. या पत्रात हैदराबाद, तेलंगण, दिल्ली, पंजाब, जम्मू आणि मेवाट येथील रोहिंग्यांवर विशेष लक्ष देत ओळख पटवण्यास सांगण्यात आले आहे.
तेलंगणमध्ये वास्तव्यास असणाऱ्या रोहिंग्यांनी तबलिगी जमातच्या हरियाणामधील मेवाट येथील कार्यक्रमात हजेरी लावली होती. हेच लोक दिल्लीमधील निजामुद्दीने मरकजमध्येही सहभागी झाले होते. रोहिंग्यांशी संबंधित लोक श्रमविहार आणि शाहीनबाग येथेही गेले होते. पत्रानुसार जे लोक या ठिकाणांवर गेले होते ते आपल्या छावण्यांमधून गायब आहेत. तबलिगी जमातशी संबंध आल्याने रोहिंग्या मुस्लीम आणि त्यांच्याशी संबंधितांची करोना चाचणी करणे महत्त्वाचे आहे.