वॉशिंग्टन – अमेरिकेने आपले नवे राष्ट्रीय सुरक्षा धोरण जाहीर केले असून प्रदीर्घ काळापासून त्यांचा सहयोगी राहीलेल्या पाकिस्तान आणि सौदी अरबला मात्र यावेळी त्यात स्थान देण्यात आलेले नाही. (Pakistan not mentioned in US National Security Strategy 2022) तर भारताचा प्रमुख सुरक्षा भागिदार असा उल्लेख करण्यात आला आहे. या धोरणानुसार अमेरिका चीनलाच आपला सगळ्यांत मोठा प्रतिस्पर्धी मानत असल्याचे अधोरेखित झाले आहे.
पाकिस्तानातील डॉन या माध्यमाने याबाबतची माहिती दिली आहे. अमेरिका रशियाला नाही, तर चीनला आपला सगळ्यांत मोठा भू-राजनैतिक प्रतिस्पर्धी मानतो आहे. बुधवारी सायंकाळी जारी करण्यात आलेल्या या दस्तावेजात दक्षिण आणि मध्या आशियातील दहशतवादाच्या आणि अन्य धोक्‍यांचा उल्लेख करण्यात आला आहे. अशा प्रकाराच्या धोक्‍यांचा सामना करताना मुख्य सहकारी म्हणून पूर्वी पाकिस्तानचा उल्लेख असायचा.
गेल्या वर्षी आणि यंदाही मात्र पाकिस्तानचे नाव सहकारी देश म्हणून वगळण्यात आले आहे. अमेरिका केवळ अफगाणिस्तान आणि अन्य देशांकडून असलेल्या धोक्‍याचा सामना करण्यासाठी माध्यम म्हणून आमचा वापर करून घेते अशी पाकिस्तानची कायमच ओरड राहीली आहे. पाकिस्तानला अफगाणिस्तान आणि भारत यांच्याशी जोडून पाहिले जाते. ते बदलण्याची गरज असल्याचेही पाकिस्तानने अलिकडे म्हटले होते.
दरम्यान, नव्या सुरक्षा धोरणात अमेरिकेने पाकचा उल्लेख टाळला असला तरी चीनसोबत घनिष्ठ मैत्री संबंध ठेवण्याची त्या देशाची इच्छा मात्र मान्य केली आहे. या अमेरिकी दस्तावेजात रशियाने युक्रेनवर लादलेल्या युध्दाबाबत टीका करण्यात आली आहे. तसेच चीन नंतर रशिया हा देशच जगाच्या हिताला मोठा धोका असल्याचे म्हटले आहे.
भारताला जगातली सगळ्यांत मोठी लोकशाही आणि प्रमुख सुरक्षा भागिदार या नजरेने अमेरिका पाहतो हे त्यांच्या सुरक्षा धोरणावरून अधोरेखित झाले आहे.
