इस्लामाबाद : पाकिस्तानमधील सध्या राजकीय वातावरण चांगलेच तापले आहे. त्यातच दुसरीकडे इंधनाच्या दरात पाकमध्ये ऐतिहासिक वाढ झाली आहे. पाकिस्तान सरकारने सर्वसामान्यांना झटका देत पेट्रोल आणि डिझेलचे दर प्रतीलिटर ३० रुपयांनी वाढवले आहेत. हे दर रात्रीपासून लागू झाले आहेत. दरम्यान, आता पाकिस्तानचे माजी पंतप्रधान इम्रान खान यांनी सरकारवर टीका केली असून दुसरीकडे मोदी सरकारचे भरभरून कौतुक केले आहे.
इंधन दरवाढीनंतर माजी पंतप्रधान इम्रान खान यांनी सरकारवर जोरदार टीका केली आहे. इम्रान खान यांनी वाढत्या इंधनाच्या दरांवरुन टीका करताना म्हटलं आहे की, “पेट्रोल आणि डिझेलच्या किंमतीत २० टक्क्यांची वाढ करत देशाने आयात केलेल्या सरकारच्या अधीनतेसाठी किंमत मोजायला सुरुवात केली आहे. ही आतापर्यंतची सर्वात मोठी ऐतिहासिक वाढ आहे. आपल्या अकार्यक्षम आणि असंवेदनशील सरकारने रशियाकडून ३० टक्के स्वस्त तेलासाठी केलेल्या कराराचा पाठपुरावा केला नाही”.
पुढच्या ट्वीटमध्ये इम्रान खान यांनी भारताने रशियाकडून स्वस्तात तेल खरेदी केल्याच्या धोरणाची तोंडभरून स्तुती केली आहे. “याउलट अमेरिकेचा धोरणात्मक सहकारी असलेल्या भारताने रशियाकडून स्वस्तात तेल खरेदी करत इंधनाच्या किंमती २५ रुपयांनी कमी केल्या आहेत. आता आपल्या देशाला बदमाशांच्या हातून महागाईचा आणखी एक मोठा डोस सहन करावा लागणार आहे”. असे इम्रान खान यांनी म्हटले आहे.
पाकिस्तानचे अर्थमंत्री मिफ्ताह इस्माइल यांनी गुरुवारी सरकारने पेट्रोलियम उत्पादनांच्या किंमती ३० ने वाढवण्याचा निर्णय सरकारने घेतला असल्याची घोषणा केली. अर्थमंत्र्यांनी इस्लामाबाद येथे पत्रकार परिषदेत ही घोषणा केली. आंतरराष्ट्रीय नाणेनिधीसोबत चर्चा फिस्टकल्यानंतर ही इंधन दरवाढ करण्यात आली. सरकारकडे किंमती वाढवण्याशिवाय अन्य कोणताही पर्याय नसल्याचं इस्माइल यांनी सांगितलं. नव्या दरांमध्ये डिझेलवर आम्हाला प्रतीलिटर ५६ रुपयांचं नुकसान सहन करावं लागत असल्याचंही ते म्हणाले.