मुंबई : शिवशक्ती आणि भीमशक्ती एकत्र आल्यानंतर राज्यात आणखी एक युती झाल्याची घोषणा शिवसेना पक्षप्रमुख उद्धव ठाकरे आणि वंचित बहुजन आघाडीचे अध्यक्ष प्रकाश आंबेडकर यांनी नुकतीच केली आहे. वंचित बहुजन आघाडीची शिवसेनेबरोबर युती झाली आहे. पण, काँग्रेस आणि राष्ट्रवादीबरोबर महाविकास आघाडीत सहभागी होण्याबद्दल अद्यापही कोणताही निर्णय झाला नाही. अशात प्रकाश आंबेडकर यांनी राष्ट्रवादी काँग्रेसचे अध्यक्ष शरद पवार यांच्याबाबत केलेल्या विधानामुळे गदारोळ सुरु आहे.
प्रकाश आंबेडकर यांनी शरद पवार आणि भाजप यांच्या साटेलोटे असल्याच्या विधानावरून राष्ट्रवादीने त्यांच्याविरोधात आक्रमक भूमिका घेतली आहे. यावर आता शिवसेना खासदार संजय राऊत यांनी भाष्य केलं आहे. “अशा प्रकारची विधानं कोणीही करु नये. देशात भाजपाविरोधी आघाडी तयार करण्याचा प्रयत्न होतोय, त्याचे स्तंभ शरद पवार आहेत. सातत्याने या आघाडीसाठी ते प्रयत्न करत आहेत,” असे संजय राऊतांनी सांगितले.
“भाजपाच्या यंत्रणांनी सर्वात जास्त हल्ले शरद पवार आणि त्यांच्या कुटुंबीयांवर केले आहेत. वंचित बहुजन आघाडी आणि शिवसेनेच्या युतीची घोषणा झाली आहे. अपेक्षा आहे, प्रकाश आंबेडकर महाविकास आघाडीचे घटक होतील. पण, महाविकास आघाडीचा भाग होण्याची प्रक्रिया सुरु असताना त्याचे स्तंभ शरद पवार यांच्याबद्दल आदर ठेवून बोललं पाहिजे,” असा सल्ला संजय राऊतांनी प्रकाश आंबेडकरांना दिला आहे.
एका वृत्तवाहिनीशी बोलताना प्रकाश आंबेडकर यांनी, “शरद पवार हे आजही भाजपाबरोबर आहेत. अजित पवार आणि देवेंद्र फडणवीस यांचा सकाळचा शपथविधी झाला होता. त्यानंतर तीन-चार दिवसाने एका वृत्तपत्रात अजित पवारांची मुलाखत छापून आली होती. त्यात अजित पवारांनी सांगितलं की, लोक मला का दोष देत आहेत, समजत नाही. हे आमच्या पक्षांचं ठरलं होतं. मी फक्त पहिला गेलो. २०१९ च्या लोकसभेपूर्वीच हे ठरलं होतं,” असा गौप्यस्फोट करत प्रकाश आंबेडकरांनी शरद पवारांना लक्ष्य केले.
