Donald Trump – इराण आता समाप्त झाला असून आता इराणने सध्या सुरू असलेले युद्ध समाप्त करण्यासाठी करार करायला हवा. अन्यथा इराणचा विनाश होईल, असे अमेरिकेचे अध्यक्ष डोनाल्ड ट्रम्प यांनी म्हटले आहे. इराणने आता करार केला नाही, तर इराणचा विनाश होईल, असे चीनचा दौरा आटोपून अमेरिकेला परतत असताना ट्रम्प यांनी एका वृत्तसंस्थेला दिलेल्या मुलाखतीत सांगितले. अमेरिका इराणला अण्वस्त्रे मिळू देणार नाही, या आपल्या निर्धाराचा ट्रम्प यांनी पुनरुच्चारही केला. इराणमधील अमेरिकेची कारवाई व्हिएतनाम आणि इराकमध्ये केलेल्या कारवाईपेक्षा खूपच छोटी होती. इराणचे नौदल आता नष्ट झाले असून त्यांच्याकडे विमानरोधी क्षमताही उरलेली नाही. त्यांनी जेवढी क्षमता वाढवली आहे, ती आम्ही एक दिवसात संपवू शकतो, असेही ट्रम्प म्हणाले. इराणने करार करावा, अशी चीनचे अध्यक्ष शी जिनपिंग यांचीही इच्छा असावी. यासाठी जिनपिंग यांनी सहाय्य करण्याची तयारीही दाखवली आहे. जर मला काही मदत करणे शक्य असेल, तर मला मदत करायला आवडेल, असे जिनपिंग यांनी म्हटल्याचे ट्रम्प यांनी सांगितले. इराणकडे अण्वस्त्रे असावीत, असे चीनलाही वाटत नसावे, असेही ते म्हणाले. अमेरिका इराणमधील खार्ग बेट अवघ्या ४ ते ५ मिनिटातच नष्ट करू शकत असल्याचा विश्वास चीनच्या जॉइंट चीफ ऑफ स्टाफ जनरल दान केन यांनी म्हटल्याचा हवालाही ट्रम्प यांनी दिला. इराणबाबत इराणच्या सहाय्याबाबत विचारले असता, चीन इराणला लष्करी उपकरणे देणार नसल्याची हमी जिनपिंग यांनी दिली. चीन सध्या ९० टक्के इराणचे तेल खरेदी करत आहे. चीनचे इराणबरोबर संरक्षण भागीदारी आहे. तसेच चीनचे इराणबरोबर निकटचे लष्करी संबंधही आहेत.