संघात झालेल्या भेदभावावर दानिश कनेरिया करणार खुलासा
इस्लामाबाद : क्रिकेट संघाचा माजी गोलंदाज शोएब अख्तरने गौप्यस्फोट करत फक्त हिंदू असल्या कारणाने दानिश कनेरिया याला संघातील इतर खेळाडूंकडून वाईट वागणूक दिली जात होती असा खुलासा केला होता. शोएब अख्तरने केलेल्या या दाव्यावर आता खुद्द दानिशने खुलासा केला आहे. हे सर्व सत्य असून पाकिस्तान संघात आपल्यासोबत भेदभाव करण्यात आल्याचे सांगितले आहे. शोएब अख्तरने हा खुलासा केल्याबद्दल दानिशने त्याचे आभार मानले असून त्याने सांगितलेली प्रत्येक गोष्ट खरी असल्याचा दुजोरा दिला आहे.
Pak cricketer Danish Kaneria to ANI on Shoaib Akhtar’s allegations that Pak players had problems eating with Kaneria as he’s a Hindu:He told the truth. I’ll reveal names of players who didn’t like to talk to me as I was a Hindu. Didn’t have courage to speak on it, but now I will. pic.twitter.com/HmeSUhtbUk
— ANI (@ANI) December 26, 2019
शोएब अख्तरने सत्य सांगितले आहे. मी हिंदू आहे म्हणून माझ्याशी न बोलणाऱ्या सर्व खेळाडूंची नावे मी जाहीर करणार. याआधी या विषयावर बोलण्याची हिंमत माझ्यात नव्हती, पण आता मी बोलणार, असे दानिशने एका वृत्तसंस्थेशी बोलताना सांगितले आहे. शोएब अख्तरने एका चॅट शोमध्ये बोलताना दानिश कनेरिया हिंदू असल्याने इतर पाकिस्तानी खेळाडू त्याला योग्य वागणूक देत नव्हते असा खुलासा केला होता.
पाकिस्तानी संघात कसोटी सामन्यात सर्वात जास्त विकेट्स घेण्याच्या यादीत दानिश चौथ्या क्रमांकावर आहे. तर पाकिस्तानी क्रिकेट संघात स्थान मिळवणारा दुसरा हिंदू धर्मीय खेळाडू आहे. याआधी अनिल दलपत पाकिस्तानी संघाकडून खेळले आहेत.
शोएब अख्तरने या विषयावर भाष्य केल्याने आता आपल्याला धैर्य मिळाले असून लवकरच त्या सर्व खेळाडूंची ज्यांनी आपल्याला अपमानास्पद वागणूक दिली त्यांची नावं जाहीर करणार असल्याचं दानिशने जाहीर केलं आहे. यावेळी त्याने एकीकडे संघात काही खेळाडू दुजाभाव करत असताना युनिस खान, इंजमाम, मोहम्मद युसूफ, शोएब अख्तर यांच्यासारखे खेळाडू आपल्या धर्माची चिंता न करता चांगली वागणूक द्यायचे असंही सांगितलं आहे.