Atal Setu : एका २८ वर्षीय तरुणाने अटल सेतूवरून समुद्रात उडी मारून आत्महत्या केल्याची घटना घडली होती. या घटनेला आता तीन दिवस उलटूनही प्रतिक सुभाष रासकर या तरुणाचा शोध लागलेला नाही. पोलिसांनी आणि बचाव पथकांनी समुद्रात व्यापक शोधमोहीम राबवली असली तरी अद्याप त्याचा मृतदेह मिळालेला नाही.

पुणे जिल्ह्यातील शिरूर तालुक्यातील रहिवासी असलेला प्रतिक रासकर हा शेअर बाजाराशी संबंधित शिकवणी वर्गांच्या कामकाजात सक्रिय होता. रविवारी (7 जून) रात्री तो कुटुंबीयांना ‘बाहेर जेवणासाठी जात आहे’ असे सांगून घराबाहेर पडला होता. त्यानंतर तो कारने अटल सेतूवर पोहोचला.

मिळालेल्या माहितीनुसार, 7 जून रोजी मध्यरात्री 1 वाजून 29 मिनिटांच्या सुमारास प्रतिकने अटल सेतूवरील यंत्रणांची नजर चुकवत थेट समुद्रात उडी घेतली. घटनेची माहिती मिळताच उलवे पोलिसांनी तातडीने शोधमोहीम सुरू केली. दिवसभर समुद्रात शोधकार्य सुरू होते, मात्र अद्याप त्याचा कोणताही ठावठिकाणा लागलेला नाही.

हेही वाचा : Kadamwakwasti murder case : धक्कादायक! चारित्र्याच्या संशयातून पत्नीवर जीवघेणा हल्ला, ४ दिवसांच्या झुंझीनंतर महिलेचा मृत्यू

प्रतिकने हे टोकाचे पाऊल का उचलले, यामागील नेमके कारण अद्याप समोर आलेले नाही. त्यामुळे या घटनेबाबत विविध तर्कवितर्कांना उधाण आले आहे.

दरम्यान, पोलिसांनी प्रतिक रासकर याचे वर्णनही जाहीर केले आहे. त्यानुसार त्याचा रंग गोरा, शरीरयष्टी मजबूत, उंची सुमारे 5 फूट 10 इंच, काळे वाढलेले केस, काळे डोळे तसेच वाढलेली दाढी-मिशी आहे. घटनेच्या वेळी त्याने पांढऱ्या रंगाचा शर्ट आणि ग्रे रंगाची पॅन्ट परिधान केली होती.

प्रतिक रासकर याच्याबाबत कोणतीही माहिती मिळाल्यास तातडीने उलवे पोलीस ठाण्याशी संपर्क साधण्याचे आवाहन पोलिसांनी नागरिकांना केले आहे.

हेही वाचा : Sharad Pawar : पुढील ३ वर्षे निवडणुका नाहीत, पण…; शरद पवारांचा विरोधकांना एकत्र आणण्याचा नवा प्लॅन