Haribhau Bagde : हरिभाऊ बागडे यांची प्रकृती अचानक बिघडल्याने त्यांना सवाई मानसिंग (एसएमएस) रुग्णालयाच्या आयसीयूमध्ये दाखल करण्यात आले आहे. सध्या डॉक्टरांच्या विशेष पथकाकडून त्यांच्यावर उपचार सुरू असून प्रकृती स्थिर असल्याची माहिती रुग्णालय प्रशासनाने दिली आहे. मिळालेल्या माहितीनुसार, राज्यपाल हरिभाऊ बागडे हे नियमित आरोग्य तपासणीसाठी रुग्णालयात गेले होते. तपासणीदरम्यान त्यांना अचानक अस्वस्थ वाटू लागल्याने डॉक्टरांनी तातडीने त्यांना आयसीयूमध्ये दाखल करण्याचा निर्णय घेतला. खबरदारीचा उपाय म्हणून त्यांना मेडिकल ICU-2 मध्ये ठेवण्यात आले आहे. राज्यपाल रुग्णालयात दाखल झाल्याची माहिती मिळताच अनेक नेते आणि अधिकारी त्यांच्या प्रकृतीची विचारपूस करण्यासाठी रुग्णालयात पोहोचले. राजस्थानचे आरोग्यमंत्री आरोग्यमंत्री गजेंद्र सिंह खिंवसार यांनी डॉक्टरांकडून त्यांच्या प्रकृतीची माहिती घेतली. तसेच उपमुख्यमंत्री प्रेमचंद बैरवा हेही राज्यपालांना भेटण्यासाठी रुग्णालयात दाखल झाले. डॉक्टरांच्या माहितीनुसार, तपासणीदरम्यान राज्यपालांना मूत्रमार्गात संसर्ग झाल्याचे निदान झाले आहे. तसेच किडनीशी संबंधित सौम्य समस्या असल्याचेही आढळले आहे. त्यामुळे विविध तज्ञ डॉक्टरांच्या देखरेखीखाली त्यांच्यावर उपचार सुरू आहेत. राज्यपालांच्या उपचारांसाठी रुग्णालय प्रशासनाने विशेष वैद्यकीय मंडळ स्थापन केले आहे. या मंडळात जनरल मेडिसिन, नेफ्रोलॉजी, युरोलॉजी, एंडोक्राइनोलॉजी आणि हृदयरोग विभागातील वरिष्ठ डॉक्टरांचा समावेश आहे. पुढील चाचण्यांचे अहवाल आल्यानंतर उपचाराची पुढील दिशा ठरवली जाणार असल्याचे डॉक्टरांनी सांगितले.