मुंबई- मराठी चित्रपटसृष्टीतील एक काळ गाजवणारे ‘महेश कोठारे’ यांचा आज वाढदिवस आहे. त्यांनी एक अभिनेता, दिग्दर्शक म्हणून मराठीमध्ये आपले एक प्रस्थ निर्माण केले आहे.
त्यामुळे आज मराठी चित्रपटसृष्टीत त्यांचे एक वेगळेच स्थान आहे. महेश कोठारे यांनी आपल्या चित्रपट सृष्टीतील वाटचालीची सुरवात बालकलाकार म्हणून केली होती.
पत्नी निलीमा, मुलगा आदिनाथ, सून उर्मिला, आई, वडील, आणि नातं जिजा असा त्यांचा परिवार आहे. महेश कोठारे समारंभात, पार्टीत नेहमी आपल्या कुटुंबासोबतच दिसतात. निलिमा आणि महेश यांचे अरेंज्ड मॅरेज झाले असून त्या दोघांनी काहीच भेटीत लग्नाचा निर्णय घेतला होता.
‘धूम धडाका’ हा त्यांनी दिग्दर्शित केलेला पहिला चित्रपट होता. त्यानंतर महेश कोठारेंनी मागे फिरूनच पाहिलं नाही. ‘दे दणा दण’, ‘थरथराट’, ‘धडाकेबाज’, ‘झपाटलेला’, ‘माझा छकुला’, ‘खतरनाक’, ‘पछाडलेला’, असे अनेक चित्रपट त्यांनी दिग्दर्शित केले. महेश कोठारे यांना विशेष म्हणजे इंस्पेक्टर भूमिकांसाठी ओळखले जाते.