दसऱ्यापासून जिम, व्यायामशाळा सुरू; ठाकरे सरकारची मोठी घोषणा

Madhuvan

मुंबई  – करोना प्रतिबंधात्मकात्मक नियम व उपायांचे सक्तीचे पालन करत राज्यातील जिम, फिटनेस सेंटर्स आणि व्यायामशाळा दसऱ्यापासून सुरु करण्यात येणार आहे, अशी घोषणा मुख्यमंत्री उद्धव ठाकरे यांनी आज केली आहे.

उद्धव ठाकरे यांनी आज जिम, फिटनेस सेंटर्स आणि व्यायामशाळा यांच्या प्रतिनिधींशी दूरदृश्‍य प्रणालीद्वारे संवाद साधला. या चर्चेत ते बोलत होते. ठाकरे म्हणाले, जिम, फिटनेस सेंटर्स आणि व्यायामशाळा याठिकाणी करोना प्रतिबंधात्मक आणि आरोग्याची काळजी घेण्यासाठी “एसओपी’चे काटेकोर पालन करण्याची ग्वाहीही या प्रतिनिधींनी मुख्यमंत्र्यांना दिली. पण स्टिम बाथ, सौना, शॉवर आणि झुंम्बा, योगा असे सामुहीक व्यायाम प्रकार एसओपी’तील निर्देशानुसार पूर्णपणे बंद राहणार असल्याचेही सांगण्यात आले.

ठाकरे म्हणाले, आरोग्याचे प्रश्न वाढू नयेत याची काळजी घ्यावी लागेल. मोठ्या शहरांबरोबच राज्यातील ग्रामीण भागातही जिम, व्यायामशाळा यांची संख्या लक्षणीय आहे. त्यामुळे हा निर्णय घेताना तयार करण्यात आलेली “एसओपी’चे काटेकोर पालन होणे आवश्‍यक आहे. हा व्यवसाय आहे, पण तसा तो जनतेच्या आरोग्याशी निगडीत आहे, याची काळजी घेणे आवश्‍यक आहे.

आता रुग्ण संख्या कमी होते आहे. पण युरोप खंडातील उदाहरणांवरून आपल्याला सावधही रहावे लागेल. आपण अनेक निर्बंध शिथील करत आहोत. पण यातून हळू-हळू गाफीलपणा वाढू नये यासाठी सर्वच घटकांनी प्रयत्न करणे आवश्‍यक आहे, असेही त्यांनी सांगितले.

मार्गदर्शक सूचना
– व्यायामासाठी येणाऱ्या सदस्यांना मार्गदर्शक सूचनांची पूर्णपणे माहिती देणे अपेक्षीत आहे.
– व्यायाम शाळेच्या वेळा, तसेच मर्यादित संख्येत प्रवेश देणे.
– प्रशिक्षक, अन्य व्यवस्थापकीय अधिकारी यांची वारंवार आरोग्य तपासणी करावी.
– शारिरीक अंतर, हातांची स्वच्छता आणि मास्क वापरणे या नियमित गोष्टी बरोबरच, क्षेत्रफळांनुसार जास्तीत जास्त सुरक्षित शारिरिक अंतर राखणे.
– व्यायामशाळेचे दर तासाला निर्जंतुकीकरण करणे.
– उपकरणांमध्ये अंतर ठेवणे, वापरानंतर त्यांचे निर्जंतुकीकरण करणे.
– दररोज रात्री जिम, व्यायामशाळा बंद झाल्यानंतर पुर्णपणे निर्जंतुकीकरण करणे.

डिजिटल प्रभात आता टेलिग्रामवर! चॅनल जॉईन करा व मिळवा सर्व महत्वपूर्ण अपडेट्स, चॅनल जॉईन करण्यासाठी येथे क्लिक करा

Leave A Reply

Your email address will not be published.