गुजरातमध्ये एका दलित व्यक्तीचा अंगठा कापल्याप्रकरणी दोघांना अटक करण्यात आली आहे. क्रिकेट सामन्यादरम्यान एक दलित मुलगा बॉल उचलण्यासाठी गेला होता, असा आरोप आहे. त्यामुळे काही लोक संतापले. नंतर त्यांनी काकांचा अंगठा कापला. माहिती मिळताच पोलिसांनी आरोपींविरुद्ध गुन्हा दाखल करून दोघांना अटक केली. या प्रकरणातील पाच आरोपी फरार आहेत.
इंडिया टुडेच्या वृत्तानुसार, हे प्रकरण पाटण जिल्ह्यातील काकोशी गावाशी संबंधित आहे. पोलिसांनी सांगितले की, ‘4 जून रोजी शाळेच्या ‘प्ले ग्राउंड’मध्ये क्रिकेटचा सामना सुरू होता. तेव्हा जवळच खेळणाऱ्या एका दलित मुलाचा टेनिस बॉल तिथे गेला. त्यानंतर वाद सुरू झाला. तेथे उपस्थित काही लोक भडकले आणि मुलाला धमकावू लागले, असा आरोप आहे. त्याने मुलावर जातीवाचक शिवीगाळही केली.’
यावर मुलाचे काका धीरज परमार यांनी आक्षेप घेतल्याने काही वेळाने प्रकरण मिटले. धीरज आणि त्याचा भाऊ कीर्ती यांच्यावर सायंकाळी सात सशस्त्र लोकांनी हल्ला केल्याचे तक्रारीत म्हटले आहे. एका आरोपीने कीर्तीचा अंगठा कापल्याचा आरोप आहे.
धीरज परमार यांनी पोलीस ठाण्यात फिर्याद दिली आहे. पोलिसांनी आयपीसी कलम 326 (स्वैच्छिकपणे धोकादायक शस्त्रांनी गंभीर दुखापत करणे), 506 (गुन्हेगारी धमकी) आणि इतर कलम आणि एससी-एसटी (अत्याचार प्रतिबंधक कायदा) अंतर्गत गुन्हा दाखल केला आहे.
दरम्यान हे पहिलेच प्रकरण नाही यापूर्वीही असेच एक प्रकरण गुजरातच्या बनासकांठा जिल्ह्यातून समोर आले होते. पोलिसांनी सांगितले होते की, 30 मे रोजी आरोपींनी दलित तरुणाला चांगले कपडे आणि सनग्लासेस घातले होते म्हणून बेदम मारहाण केली होती. तरुणाची आई त्याला वाचवण्यासाठी आली असता, नराधमांनी तिलाही बेदम मारहाण केली आणि जीवे मारण्याची धमकी दिल्याचा आरोप आहे. याप्रकरणी सात जणांविरुद्ध गुन्हा दाखल करण्यात आला होता.’
