नवी दिल्ली – करोना संसर्गामुळे संपूर्ण जग त्रस्त आहे. अशा स्थितीत आशादायक वृत्त आले तर सुरक्षिततेची भावना निर्माण होते. असंच आशादायक वृत्त वॉशिंग्टन विद्यापीठाच्या स्कूल ऑफ मेडीसीन विभागातून आलं आहे. येथील संशोधकांनी म्हटलं की, करोनाचे सौम्य लक्षणं असलेल्या रुग्णांच शरीर कायमस्वरुपी करोना व्हायरसशी लढा देऊ शकतं. म्हणजेच तुमच्या शरीरात करोना व्हायरसशी लढा देणारी अँटीबॉडी नियमीत तयार होत राहतात.
सर्वात मोठी दिलासादायक बाब म्हणजे करोना संसर्ग झाल्याच्या ११ महिन्यांनंतर पुन्हा शरीरात अँटीबॉडी विकसीत होत आहेत. अमेरिकेच्या लुईस स्थित वॉशिंग्टन विद्यापीठाच्या स्कूल ऑफ मेडीसीनच्या संशोधकाचा अभ्यास सायन्स जर्नल ‘नेचर’मध्ये प्रकाशित झाला आहे. त्यात म्हटलं की, करोना पूर्णपणे बरा झाल्यानंतर काही महिन्यांनी करोना व्हायरसशी लढण्यासाठी अँटीबॉडी सेल्स काम करतात. या सेल्स करोना प्रतिरोधक क्षमता विकसीत करतात.
आश्चर्यजनक बाब म्हणजे, अँटीबॉडी जीवनभर तुमच्या शरीरात राहू शकतात. याचा अर्थ संपूर्ण जीवनभर तुमच्या शरीरात अँटीबॉडी तयार करण्याची क्षमता राहणार असून ती करोनाशी लढा देऊ शकते.
स्कूल ऑफ मेडिसीन विद्यापीठाचे सहयोगी प्राध्यापक अली एलेबेडी म्हणाले की, करोनाच्या पहिल्या लाटेनंतर सांगण्यात आलं होत की, करोनामुक्त झाल्यानंतर तयार झालेल्या अँटीबॉडी अधिक काळ शरीरात राहत नाही. मात्र हे खोटं आहे. कालांतराने अँटीबॉडी कमी होतात. इम्युनिटी देखील कमी होते. मात्र पुन्हा अँटीबॉडी रिकव्हर होतात.
अली एलेबेडी यांनी पुढे म्हटलं की, ‘कोरोनाची प्रथम लक्षणे दिसल्यानंतर 11 महिन्यांनी आम्हाला संबंधित रुग्णांमध्ये अँटीबॉडी तयार करणाऱ्या पेशी आढळल्या आहेत. या पेशी रुग्ण जिवंत असे पर्यंत त्याच्या शरीरात अँटीबॉडीज तयार करत असतात. दीर्घकालीन रोगप्रतिकारक शक्तीचा हा सबळ पुरावा म्हणता येईल.
Good news from Washington University School of Medicine in St. Louis on antibody immunity – https://t.co/dyMBE4oZQO
— IB. Sekandi (@theChairmanB) May 25, 2021
दरम्यान संसर्ग संपुष्टात आल्यानंतर यातील बहुतांश पेशी नष्ट होतात आणि रक्तातील अँटीबॉडीची पातळी कमी झाल्याचे दिसून येते. पण अँटीबॉडी तयार करणाऱ्या काही प्रमाणात पेशी ज्यांना दीर्घकालीन प्लाझ्मा पेशी म्हणतात, या अस्थिमज्जा म्हणजेच बोनमॅरो मध्ये स्थलांतरित होऊन त्याठिकाणी स्थायिक होतात. पुन्हा विषाणू संसर्गापासून संरक्षण मिळावे यासाठी या पेशी रक्तात सातत्याने काही प्रमाणात प्रवाहित होत असतात.