नवी दिल्ली – जागतिक बाजारात डॉलर कमकुवत होत असल्यामुळे गेल्या तीन दिवसापासून सोन्याच्या दरात वाढ होत आहे. गुरुवारी भारतीय सराफात सोन्याचा दर 402 रुपयांनी वाढून 52,297 रुपये प्रति दहा ग्रॅम झाला. तयार चांदीचा दर 711 रुपयांनी वाढून 56,191 रुपये प्रति किलो या पातळीवर गेला.
जागतिक बाजारात सोन्याचा दर वाढून 1,763 डॉलर व चांदीचा दर 19.35 डॉलर प्रति औंस या पातळीवर गेला होती. सध्या जागतिक बाजारात सोन्याच्या किमती वाढत असल्याबद्दल एचडीएफसी सिक्युरिटीज ज्या संस्थेचे विश्लेषक तपन पटेल यांनी सांगितले की, अमेरिकेतील अर्थव्यवस्था कमकुवत झाल्याची आकडेवारी जारी झाली आहे. तेथील बेकारीचा दर वाढला आहे.
त्याचबरोबर ग्राहकाकडून खरेदी कमी होत आहे. त्यामुळे अमेरिकेत मंदी निर्माण होण्याची शक्यता व्यक्त करण्यात येत आहे. गेल्या आठवड्यात अशी शक्यता व्यक्त करण्यात आल्यानंतर डॉलर कमकुवत होत आहे. त्याचबरोबर अमेरिकेच्या कर्जरोख्यावरील परतावा कमी होत आहे. अशा परिस्थितीमध्ये बरीच गुंतवणूक सोन्याकडे वळत असल्यामुळे सोन्याचे दर वाढत असल्याचे वातावरण आहे.
काही काळ मंदी निर्माण झाली तरी अमेरिका महागाई कमी करण्यासाठी व्याजदरात वाढ करणार असल्याचे गेल्या आठवड्यात स्पष्ट करण्यात आले आहे. त्यामुळे आगामी काळामध्ये अमेरिकेची उत्पादकता कमी होऊन अमेरिकन डॉलर कमकुवत होईल. अशा परिस्थितीमध्ये सोन्याचे दर वाढत असल्याचे त्यांनी सांगितले. मात्र जागतिक परिस्थिती बरीच लवचिक आहे. त्यामुळे दीर्घ पल्ल्यात सोन्याचे दर वाढतील की नाही याबाबत खात्री देता येत नसल्याचे त्यांनी सूचित केले.