लखनौ – उत्तर प्रदेशचे मुख्यमंत्री योगी आदित्यनाथ यांचा एक कथित ऑडिओ व्हायरल झाला आहे. त्यात योगी आदित्यनाथ सपोर्ट करणाऱ्यांना दोन रुपये देणार असल्याचे सांगत आहेत. योगी आदित्यनाथ यांच्या सोशल मीडिया टीमचा हा ऑडिओ असल्याचा दावा केला जात आहे.
अगोदर करोनाची हाताळणी करण्यात आलेले अपयश, गंगा नदीत सापडणारी प्रेते, आंदोलन आणि शिक्षकांचे मृत्यू, पंचायत निवडणुकांत झालेला पराभव यामुळे योगींची डोकेदुखी वाढली आहे. पुढच्या वर्षी राज्यात विधानसभा निवडणूक होणार असल्याने भाजपच्या गोटात चिंतेचे वातावरण असताना आता हे कथित ऑडिओ प्रकरण भाजपची व योगींची डोकेदुखी वाढवणार आहे.
एका वाहिनीने यासंदर्भातील वृत्त दिले आहे. टूलकिट प्रकरणाचा हा ऑडिओ व्हायरल झाल्यानंतर आयटी सेलचे प्रमुख मनमोहन सिंह यांना काढून टाकण्यात आले आहे. या प्रकरणाचा भाजप आणि मुख्यमंत्री योगी आदित्यनाथ यांचा काही संबंध नसल्याचा दावा भाजपचे प्रवक्ते मनीष शुक्‍ला यांनी केला आहे. हा एका खासगी कंपनीशी संबंधित वाद असल्याचे शुक्‍ला यांचे म्हणणे आहे.
ही ऑडिओ क्‍लिप निवृत्त सनदी अधिकारी सूर्य प्रताप सिंह यांनी सोशल मीडियावर शेअर केली आहे. हे प्रकरण समोर आल्यानंतर योगींच्या सोशल मीडिया टीमवर प्रश्न उपस्थित केले जात आहे. तर, भाजपने या प्रकरणापासून अंग झटकले असून कंपनीने कुणाला ठेवावे आणि कुणाला नाही ठेवावे हा त्यांचा प्रश्न आहे, अशी भूमिका भाजपने घेतली आहे.
दरम्यान, हजारों जवाबों से अच्छी हमारी खामोशी न जाने कितने सवालों की आबरु रख ली असे सूचक ट्‌वीट मनमोहन सिंह यांनी केले आहे.
टूलकिट हे एक असं डॉक्‍युमेंट आहे, ज्यामध्ये आंदोलनादरम्यान सोशल मीडियावर समर्थन कसं मिळवावं, कोणते हॅशटॅग वापरावेत, आंदोलनावेळी जर काही अडचणी आल्या तर कुठे संपर्क करावा, आंदोलनावेळी काय करावं, काय करु नये असा सर्व कार्यक्रम या टूलकिटमध्ये सांगितला आहे.