Ghatai Devi Temple : शिवेंद्रसिंहराजेंचा मोठा ‘मास्टरस्ट्रोक’! घाटाई देवी मंदिरासाठी आणला तब्बल ‘इतक्या’ कोटींचा निधी

Ghatai Devi Temple – राज्यातील लाखो भाविकांचे श्रद्धास्थान असलेल्या सातारा तालुक्यातील घाटवण येथील श्री. घाटाई देवी देवस्थान ट्रस्ट यात्रास्थळाला ब वर्ग दर्जा मिळवून देणाऱ्या ना. शिवेंद्रसिंहराजे भोसले यांच्या पाठपुराव्यातून श्री. घाटाई देवी यात्रास्थळाच्या सुशोभीकरणासह विविध विकासकामे मार्गी लावण्यासाठी तब्बल २ कोटी ७६ लाख ४० हजार रुपये निधी मंजूर करण्यात आला आहे. यामुळे या तीर्थस्थळाचे रुपडे पालटणार असून भाविकांसाठी विविध प्रकारच्या सोयीसुविधा निर्माण होणार आहे. निधी उपलब्ध करून दिल्याबद्दल ना. शिवेंद्रसिंहराजे यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्राताई पवार यांचे आभार मानले आहेत.

जगप्रसिद्ध कास पठार परिसरात असलेल्या घाटवण येथील घाटाईदेवीच्या यात्रेला दरवर्षी हजारो भक्त- भाविक येत असतात. यापूर्वी ‘क’ वर्ग दर्जा असल्याने या तीर्थक्षेत्राच्या विकासासाठी मर्यादा येत होत्या. राज्याचे सार्वजनिक बांधकाम मंत्री शिवेंद्रसिंहराजे भोसले यांनी राज्य शासनाकडे पाठपुरावा केला.

आणि त्यांच्याच प्रयत्नामुळे राज्याच्या ग्रामविकास विभागाने ‘पुण्यश्लोक अहिल्यादेवी होळकर ग्रामीण यात्रास्थळ योजनेतून घाटाईदेवी तीर्थक्षेत्राला काही दिवसांपूर्वीच ब वर्ग दर्जा प्रदान केला आहे. केवळ यावरच न थांबता या तीर्थस्थळाच्या सर्वांगीण विकासासाठी निधी उपलब्ध व्हावा, यासाठी ना. शिवेंद्रसिंहराजे यांचा पाठपुरावा सुरु होता.

ना. शिवेंद्रसिंहराजेंच्या पाठपुराव्याला मोठे यश आले असून श्री. घाटाई देवी तीर्थस्थळाच्या सुशोभीकरणासह येथील विविध विकासकामे मार्गी लावण्यासाठी पुण्यश्लोक अहिल्यादेवी होळकर ग्रामीण यात्रास्थळ योजना ब वर्ग सहायक अनुदाने (वेतनेत्तर) सन २०२६- २७ या आर्थिक वर्षात अर्थसंकल्पीत निधीतून २ कोटी ७६ लाख ४० हजार रुपये निधी मंजूर करण्यात आला आहे.

मंजूर निधीतून श्री घाटाई देवी देवस्थान ट्रस्ट यात्रास्थळ येथे सुशोभीकरण करण्यासाठी १ कोटी, भोजन कक्ष बांधणे ५९ लाख ९० हजार, संरक्षक भिंत बांधणे २० लाख, महिला व पुरुष स्वच्छतागृह व स्नानगृह बांधणे ३० लाख, वाहनतळ करणे ५० लाख, विद्युतीकरण करण्यासाठी १६ लाख ५० हजार रुपये निधी मंजूर झाला आहे.

मंजूर कामांची निविदा प्रक्रिया व इतर शासकीय सोपस्कार तातडीने पूर्ण करून कामे तात्काळ सुरु करा. सर्व कामे दर्जेदार करून वेळेत पूर्ण करा, अशा सूचना ना. शिवेंद्रसिंहराजे यांनी संबंधित अधिकाऱ्यांना केल्या आहेत.