कात्रज – धनकवडी येथून दत्तनगरकडे जाणाऱ्या रस्त्यावरील राजमाता भुयारी मार्ग येथे खोदकामात महाराष्ट्र नॅचरल गॅस लिमिटेडची पॉलिथिन गॅस पाइपलाइन फुटल्याने पाच हजार गॅस ग्राहकांची मोठी गैरसोय झाली. स्वयंपाक, गैस गिझर अशी सर्वच दैनंदिन कामे रेंगाळल्याने ग्राहकांना संताप व्यक्त केला. पाइपलाइन दुरूस्त करेपर्यंत सायंकाळ झाली तो पर्यंत ग्राहक “गॅस’वरच होते.
कात्रज वंडर सिटी येथे पालिकेच्या पंपिंग स्टेशनचे काम सुरू आहे. पंपिंग स्टेशनपासून वडगाव पंपिंग स्टेशनकडे पाइपलाइन जोडण्याकरिता एल ऍन्ड टी कंपनीकडून जेसीबीद्वारे रस्त्याच्या बाजूने खोदण्यात येत आहे. अनेक ठिकाणी विना सूचना, सुरक्षा यंत्रणा विना रस्ते खोदण्यात आलेले असताना कोणत्याही महावितरणच्या केंबल्स्, फोनच्या केबल्स् तसेच ज्या ठिकाणी गॅस पाइपलाइन आहे, अशा ठिकाणी खोदकाम करतानाही सुरक्षा बाळगली जात नसल्याने आजची घटना घडली.
कात्रज स्टेशनपासून ही गॅसवाहिनी जांभुळवाडीकडे जाते. सुमारे 4 बार प्रेशरची ही वाहिनी आहे. खोदकाम करताना राजमाता भुयारी मार्ग जवळ दुपारी दीडच्या सुमारास फुटली, त्यावेळी दहा मिनिटे मोठ्या प्रेशरने गॅस बाहेर पडत होता. नागरिकांनी तत्काळ अग्निशमन दलास कळविले. तोपर्यंत महाराष्ट्र नॅचरल गॅस लिमिटेडमार्फत पुरवठा बंद करण्यात आला होता, मुख्य वाहिनी फुटली असती तर आगीचा तसेच स्फोटाचा मोठा धोका होता. मात्र, 4 बारची वाहिनी फुटल्याने कात्रज, मोरेबाग परिसर, आंबेगाव, जांभुळवाडी, धनकवडी, परिसरातील सुमारे 35 ते 40 सोसायटीतील अंदाजे पाच हजार ग्राहकांची गैरसोय झाली. याबाबत महाराष्ट्र नॅचरल गॅस लिमिटेडकडे तक्रार करण्यात आल्या.
पुणे शहर व उपनगर परिसरातील जिकडे-तिकडे चोहीकडे विकासकामांच्या नावाखाली खोदकाम सुरू आहे. मात्र, अशा कामांत सुरक्षा साधने व सुरक्षा यंत्रणेचा वापर याकडे संबंधित ठेकेदारांकडून दुर्लक्ष केले जात आहे.
जेसीबीद्वारे खोदकाम होत असताना 4 बार प्रेशरची वाहिनी फुटल्याने त्या ठिकाणी गॅस लिक झाला होता. तत्काळ अग्निशमन दल मार्फत त्या ठिकाणी पोहोचून गॅसगळती बंद करण्यात आली, त्यानंतर गॅस वाहिनी दुरुस्तीचे काम करण्यात आले. ज्या ठिकाणी गॅस वाहिनी आहे तेथे फलक लावण्यात आलेले असतात. मात्र, त्याकडे दुर्लक्ष करून व खोदकाम केले जाते. आमच्या कर्मचारी व अधिकाऱ्यांना सूचना देऊन अशी कामे केल्यास अशा घटना घडणार नाहीत.
– ओंकार काळे, मुख्य अभियंता, महाराष्ट्र नॅचरल गॅस लिमिटेड