पुणे -महापालिकेच्या अंदाजपत्रकात गेल्या चार वर्षांपासून ई-वाहन खरेदीसाठी तसेच वाहन भाडेतत्वार घेण्यासाठी तरतूद होती. पण, त्याकडे सोयीस्कर दुर्लक्ष करणाऱ्या पालिका प्रशासनाला अखेर पेट्रोल आणि डीझेलच्या दरवाढीची झळ बसण्यास सुरूवात झाली आहे. त्यामुळे महापालिकेकडून ई- वाहनांचा वापर वाढविण्याचा निर्णय घेतला असून अधिकारी व पदाधिकाऱ्यांसाठी पर्यावरणापूरक ई वाहने भाड्याने घेण्यात येणार आहेत.
यासाठीचा प्रस्ताव स्थायी समितीसमोर ठेवण्यात येणार आहे. त्या अंतर्गत पहिल्या टप्प्यात 38 वाहने महापालिका 8 वर्षांसाठी भाडेकराने घेणार असून 23 कोटी 28 लाख रुपये टप्पटप्प्याने देणार आहे. पेट्रोल, डीझेलवरील मोटारींसाठी प्रत्येक महिन्याला 63 हजार रुपये इंधन खर्च येतो. ई मोटारीसाठी एका महिन्यासाठी 58 हजार 350 रुपये खर्च येणार आहे. प्रत्येक मोटारीमागे प्रति महिना सरासरी 4 हजार 655 रुपये बचत होणार आहे.
38 वाहनांसाठी दरमहा 1 लाख 77 हजार रुपये खर्च कमी होणार आहे. केंद्र सरकारच्या पुढाकाराने स्थापन झालेल्या मे. एनर्जी ईफिसिएन्सी लि. कडे महापालिकेने ई मोटारी भाडेतत्वावर पुरवण्यासाठी विचारणा केली होती. त्यानुसार मे. एनर्जी ईफिसिएन्सी लि. ने महापालिकेला टाटा नेक्सॉन कंपनीच्या ई मोटारी चालकासह 8 वर्षे भाडेतत्वावर देण्याची तयारी दाखवली आहे. 8 वर्षे कारचा वापर केल्यानंतर किमतीच्या 5 टक्के रक्कम भरून या कार पालिकेच्या मालकीच्या होऊ शकतात. वाहनांसाठी चालकासह 23 कोटी 28 लाख 88हजार रुपये खर्च येणार आहे.