मुंबई – शिवसेनेत बंड घडवून महाविकास आघाडी सरकार पाडण्याचे पाप भाजपने केले हे महाराष्ट्राची जनता आणि महाविकास आघाडीचे नेते, कार्यकर्ते व पदाधिकारी कधीच विसरणार नाहीत असे सांगत राष्ट्रवादी काँग्रेस पक्ष आजपासूनच भाजपसमोर एक आव्हान म्हणून उभा राहणार असल्याचा स्पष्ट इशारा प्रदेश प्रवक्ते महेश तपासे यांनी दिला आहे. भाजपची सत्ता येताच राष्ट्रवादी काँग्रेस एक सक्षम विरोधी पक्ष म्हणून काम करताना पाहायला मिळेल असा विश्वासही महेश तपासे यांनी यावेळी व्यक्त केला.
राष्ट्रवादी काँग्रेसचे सर्व आमदार मुंबईत असल्याने त्यांनी आज शरद पवार यांची भेट घेतली. या भेटीत शरद पवार यांनी मविआ सरकार पाडण्यासाठी झालेल्या घडामोडी आणि येत्या काळात कशा पद्धतीने भाजप विरोधात लढा द्यायचा याचे सविस्तर मार्गदर्शन केले.
अडीच वर्ष महाविकास आघाडीचे सरकार होते. या सरकारला शरद पवार यांनी योग्य मार्गदर्शन केले. उपमुख्यमंत्री अजित पवार यांनी निधीचे समान वाटप करताना राज्याची आर्थिक घडी विस्कटणार नाही याची काळजी घेतली, असेही महेश तपासे म्हणाले.
शिवसेनेत जी बंडाळी झाली त्याला खतपाणी भाजपने घातले हे सर्व महाराष्ट्र पाहत आहे. आजपासूनच राष्ट्रवादी काँग्रेस आपल्या शिलेदारांसह पुन्हा मैदानात उतरली असून येणाऱ्या निवडणुकीत भाजपविरोधात मविआचेच उमेदवार निवडून आणण्याचा चंग नेत्यांनी, कार्यकर्त्यांनी व पदाधिकार्‍यांनी बांधला असल्याचे महेश तपासे यांनी स्पष्ट केले.
