नवी दिल्ली – सुनील गावसकर यांचा स्वभाव अत्यंत मर्मविनोदी आहे. त्याने कोहलीच्या फलंदाजीचा व्हिडीओ पाहून त्याने अनुष्काच्या गोलंदाजीवर सराव केला, असे मत व्यक्त केले. हा समजून घेतला तर केवळ एक विनोद आहे. मात्र, भारतीयांमध्ये मुळातच विनोदबुद्धीचा आभाव असल्याने माध्यमांनीही त्यांच्या वक्तव्याचा विपर्यास केल्याने हा विनोद वादात रूपांतरीत झाला, असे सांगून माजी आंतरराष्ट्रीय कसोटीपटू फारुख इंजिनिअर यांनी गावसकर यांची बाजू घेतली आहे.
यंदा अमिरातीत सुरू असलेल्या आयपीएल स्पर्धेतील सामन्यात कोहलीची कामगिरी अत्यंत निराशाजनक होत आहे. त्यावर थेट प्रक्षेपणादरम्यान उपरोधिक टीका करताना गावसकर यांनी आपले मत व्यक्त केले होते. लॉकडाऊनच्या काळात कोहलीने अनुष्काच्या गोलंदाजीवरच सराव केला असे वाटते, असे गावसकर म्हणाले होते. त्यावरून प्रचंड गदारोळ झाला होता.
अनुष्कानेही गावसकर यांना प्रत्युत्तर दिले होते तर गावसकर यांनी आपल्या वक्तव्याचा विपर्यास केला, असे स्पष्टीकरणही दिले होते. त्यावर गावसकर यांची बाजू घेण्यासाठी इंजिनिअर यांनी आपले मत मांडले आहे. आम्हा, भारतीयांमध्ये विनोदबुद्धीचा अभावच आहे. जर सुनील गावसकर कोहली व अनुष्काबद्दल काही म्हणाले असतील तर तो नक्कीच गमतीचा भाग असेल. मी त्याला खूप चांगला ओळखतो. त्याचा स्वभावच विनोदी आहे, असेही इंजिनिअर यांनी सांगितले.
