मुंबई – इंग्लंडमध्ये दाखल झालेल्या भारतीय क्रिकेट संघाला बुधवारी नव्या वृत्ताने धक्का बसला आहे. संघाचा माजी कर्णधार व प्रमुख फलंदाज विराट कोहली याला करोनाची बाधा झाल्याचे सांगण्यात येत आहे. मालदीववरून सुट्टी घालवून परतलेल्या कोहलीने इंग्लंडमध्ये भरपुर भटकंती केली. त्याचदरम्यान त्याने अनेक चाहत्यांनाही भेट देत त्यांच्यासह सेल्फीही काढल्या. मात्र, आता कोहलीचे हेच वर्तन संपूर्ण संघाला भोवणार असल्याचे चित्र निर्माण झाले आहे. यावरूनच बीसीसीआयने नाराजी व्यक्त केली असून करोनाचा धोका पूर्णपणे संपलेला नसतानाही खेळाडूंचे हे वर्तन अत्यंत बेजबाबदार असल्याचे मतही व्यक्त केले जात आहे.
गेल्या वर्षी स्थगित करण्यात आलेला पाचवा कसोटी सामना खेळण्यासाठी कोहलीसह संपूर्ण भारतीय कसोटी संघ येथे दाखल झाला होता. त्यानंतर नियमित कर्णधार रोहित शर्मा व कोहली सातत्याने मिळालेल्या वेळेत शॉपिंग करतानाही दिसले. यावरून बीसीसीआयने त्यांना कठोर शब्दांत सुनावलेही होते. गेल्या वर्षी करोनाचाच धोका वाढल्यामुळे ही कसोटी पुढे ढकलली गेली होती. आता कोहलीलाच करोनाची बाधा झाल्याने यावेळीही कसोटीवर करोनाचे सावट निर्माण झाले आहे.
पत्नी व अभिनेत्री अनुष्का शर्मासह मालदीवला सुट्टीचा आनंद लुटण्यासाठी गेलेला कोहली काही दिवसांपूर्वी इंग्लंडला दाखल झाला होता. त्याने संघाच्या सराव सत्रातही सहभाग घेतला होता. इंग्लंडला रवाना होण्यापूर्वी भारतीय संघाचा प्रमुख फिरकी गोलंदाज रवीचंद्रन अश्विन याचा करोना अहवालही पॉझिटिव्ह आल्याने त्याला विलगीकरणात पाठवले गेले आहे. त्याचा कालावधी संपल्यावर पुन्हा एकदा चाचणी केली जाणार असून त्याचा अहवाल आल्यावरच तो इंग्लंडला जाणार का हे स्पष्ट होणार आहे. मात्र, आता कोहलीला करोनाची बाधा झाल्यामुळे त्याने रुग्णालयात जाऊन पुन्हा चाचणी केली आहे. मात्र, त्याचा अहवाल अद्याप मिळालेला नाही.
येत्या 1 जुलैपासून बर्मिंगहॅमला ही कसोटी खेळवली जाणार आहे. त्यापूर्वीच कोहलीबाबतचे वृत्त आल्यामुळे सजग झालेल्या बीसीसीायने इंग्लंडमध्ये असलेल्या सर्व खेळाडू, सपोर्ट स्टाफ तसेच संघाशी संबंधित प्रत्येकाची करोना चाचणी करण्याचा निर्णय घेतला आहे.
इंग्लंड संघातही एन्ट्री
या कसोटी सामन्यासाठी सज्ज होत असलेल्या इंग्लंड संघातही कोरोनाची एन्ट्री झाली आहे. संघाचे फलंदाजी प्रशिक्षक मार्कस ट्रेस्कोथीक यांना करोनाची बाधा झाल्याचे समोर आले आहे. या दोन संघातील कसोटीपूर्वी भारतीय संघ शुक्रवारपासून लिसेस्टर काउंटी संघाविरुद्ध सराव सामना खेळणार आहे. आता खेळाडूंचे चाचणी अहवाल काय येतात त्यावर या सामन्याचेही भवितव्य अवलंबून आहे. त्यातच इंग्लंडचा कर्णधार बेन स्टोक्सची प्रकृतीही बिघडल्याचे बोलले जात आहे. स्टोक्सचा कोरोना चाचणी अहवाल निगेटिव्ह आला असला तरी तो संघासोबत सराव करताना दिसलेला नाही.
कोहली बरा झाल्याचा खुलासा
कोहलीला करोनाची बाधा झाल्याचे बीसीसीआयनेही मान्य केले मात्र, आता तो आता पूर्ण बरा झाला असल्याचा खुलासाही करण्यात आला आहे. कोहलीने उपचार घेतल्यावर तसेच आवश्यक कालावधी पूर्ण केल्यावर संघासह सरावही सुरू केला. मात्र, तरीही अद्याप कोहलीने विलगीकरण कालावधी पूर्ण केला होता का, तसेच त्याला बाधा झालेली असताना त्याच्या संपर्कात कोण आले होते याबाबत अद्याप कोणतीही माहिती देण्यात आलेली नाही.