पुणे : पुण्यात काँग्रेसला पुन्हा एकदा मोठा धक्का बसणार आहे. माजी आमदार रवींद्र धंगेकर यांच्या पाटोपाठ भोरचे माजी आमदार संग्राम थोपटे हे काँग्रेसला सोडचिठ्ठी देणार आहेत. भाजपचे कार्याध्यक्ष रवींद्र चव्हाण यांच्या पुढाकाराने संग्राम थोपटे भाजपमध्ये प्रवेश करणार असल्याची प्राथमिक माहिती मिळत आहे. संग्राम थोपटे हे काँग्रेसचे बडे नेते असून ते तीन वेळा आमदार होते. तर त्यांचे वडील अनंतराव थोपटे हे सहा वेळा भोर विधानसभेचे आमदार होते. त्यांच्या या पक्ष प्रवेशामुळे काँग्रेसला मोठा धक्का बसण्याची शक्यता आहे.
काँग्रेस पक्षाचे निष्ठावंत माजी आमदार संग्राम थोपटे कार्यकर्त्यांशी चर्चा करून भाजपमध्ये पक्ष प्रवेश करणार असल्याची माहिती सूत्रांनी दिली. कार्यकर्त्यांसोबत बैठका घेऊन थोपटे भाजपमध्ये जाण्यासाठी कार्यकर्त्यांचे मत घेत आहेत. रविवारी (दि. 20) भोर येथील अनंतराव थोपटे महाविद्यालयाच्या सभागृहामध्ये भोरच्या कार्यकर्त्यांसमवेत थोपटे बैठक घेणार आहेत. त्यानंतर मंगळवारी (दि. 22) मुंबई येथे भाजपच्या वरिष्ठ नेत्यांच्या उपस्थितीत प्रवेश होणार असल्याची माहिती मिळत आहे.
विधानसभा निवडणुकीत संग्राम थोपटे यांना पराभवला सामोरे जावे लागले आहे. थोपटे हे तीनवेळा आमदार झाले. मात्र काँग्रेसची सत्ता असतानाही पक्षश्रेष्ठींनी त्यांना मंत्रिपदावरून डावलले. विधानसभा निवडणुकीतील पराभव संग्राम थोपटे यांच्या जिव्हारी लागला आहे. त्यातूनच त्यांनी काँग्रेस पक्षाला सोडचिठ्ठी देण्याचे ठरवले असल्याची माहिती सूत्रांनी दिली. दरम्यान, केंद्रीय मंत्री अमित शहा यांचीही भेट थोपटे यांनी घेतल्याची माहिती मिळत आहे.
कोण आहेत संग्राम थोपटे ?
संग्राम थोपटे हे काँग्रेसचे ज्येष्ठ नेते आणि माजी मंत्री अनंतराव थोपटे यांचे पुत्र असून, भोर तालुक्यात त्यांचा ठसा आहे. त्यामुळे त्यांच्या भाजप प्रवेशामुळे काँग्रेसला मोठा धक्का बसणार आहे, असे राजकीय वर्तुळात बोलले जात आहे.
संग्राम थोपटेंचा राजकीय प्रवास?
सोनिया गांधींचे निकटवर्तीय अनंतराव थोपटेंचे संग्राम थोपटे पूत्र
संग्राम थोपटेंना वडिलांपासून राजकीय वारसा मिळाला
2002 मध्ये संग्राम थोपटे भोर पंचायत समितीमध्ये उपसभापती झाले
2009 मध्ये भोर मतदारसंघातून विजय मिळवत पहिल्यांदा संग्राम थोपटे आमदार झाले
त्यानंतर 2014 आणि 2019च्या विधानसभेत विजय मिळवत संग्राम थोपटेंनी हॅटट्रिक केली
विधानसभेत विजयाची हॅटट्रिक केलेल्या संग्राम थोपटेंना 2024मध्ये पराभव स्वीकाराव लागला.
