दिल्लीतील सफदरजंग रुग्णालयात मृत्यू
नवी दिल्ली : उन्नाव येथील बलात्कार पीडितेची मृत्यूशी झुंज अखेर अपयशी ठरली आहे. कारण शुक्रवारी दिल्लीतील सफदरजंग रुग्णालयात उपचारादरम्यान मृत्यू झाला आहे. बलात्कार पीडित महिलेला गुरुवारी पहाटे आरोपींनी जाळण्याचा प्रयत्न केला होता, त्यात ती 90 टक्क्यांहून अधिक भाजल्यानंतर तिला दिल्लीतील सफदरजंग रुग्णालयात दाखल करण्यात आले होते. रात्री 11.40 च्या सुमारास सफदरजंग रुग्णालयात तिचा मृत्यू झाला. कार्डिऍक अरेस्टमुळे तिचा मृत्यू झाल्याची माहिती डॉक्टरांकडून देण्यात आली. यापूर्वी तिला कृत्रिम श्वसन यंत्रणेवर ठेवण्यात आले होते.
Set on fire, Unnao rape victim died due to cardiac arrest at Safdarjung hospital
Read @ANI story | https://t.co/gQg4HI4Ki2 pic.twitter.com/7IoIjDtewh
— ANI Digital (@ani_digital) December 6, 2019
तिच्यावर गेल्यावर्षी बलात्कार करणाऱ्या दोन आरोपींपैकी एकाला दहा दिवसांपूर्वी जामीन मिळाला होता. तर या प्रकरणातील दुसरा आरोपी फरार आहे. गुरुवारी सकाळी पाच जणांनी तिच्यावर हल्ला करून तिला पेटवून दिले होते. नंतर तिला जखमी अवस्थेत लखनौ येथे आणि नंतर तेथून दिल्लीतील सफदरजंग रुग्णालयात दाखल करण्यात आले. दिल्ली वाहतूक पोलिसांनी तिला विमानतळावरून तातडीने रुग्णालयात नेण्यासाठी विनाअडथळा हरित मार्गिका उपलब्ध करून दिली होती.
बलात्कार पीडितेला जाळणाऱ्या आरोपींच्या नातेवाईकांकडून आपल्याला धमक्या दिल्या जात असल्याचा आरोप शुक्रवारी पीडितेच्या काकांनी केला. एका आरोपीच्या नातेवाईकाने आपल्याला तुमचे दुकान जाळून टाकण्यात येईल, इतकेच नव्हे तर तुम्हाला जिवंत सोडणार नाही, अशी धमकी दिल्याचे त्यांनी वार्ताहरांना सांगितले.
पीडित महिलेने पोलिसांना दिलेल्या जबाबानुसार, एकूण सहा जणांनी मिळून तिच्यावर हल्ला केला होता. यावेळी तिच्या डोक्यावर आणि गळ्यावर चाकूने वार करण्यात आले. पीडित महिला जमिनीवर पडली असता तिच्यावर केरोसिन टाकून जाळण्यात आलं. यावेळी काही जणांनी पीडितेची मदत करण्यासाठी धाव घेतली. मात्र आरोपींनी घटनास्थळावरुन पळ काढला. स्थानिकांनी फोन करुन या घटनेची माहिती पोलिसांना दिली होती.