पत्रकार पांडुरंग नामेदव पवार यांचे अपघाती निधन : एकजण गंभीर जखमी
सातारा – सातारा – लोणंद मार्गावर जरंडेश्वर नाका परिसरात भिक्षेकरी गृहाजवळ झालेल्या भीषण अपघातात साताऱ्यातील उत्कृष्ट मॅरेथॉनपटू व पत्रकार पांडुरंग नामेदव पवार (वय 43 मूळ रा.धावडशी ता. सातारा सध्या रा. गुरुवार पेठ, सातारा) यांचा दुर्दैवी मृत्यू झाला असून या दुर्घटनेत त्यांचे सहकारी गंभीर जखमी आहेत. पांडुरंग पवार यांच्या निधनाने पत्रकारिता क्षेत्रावर शोककळा पसरली आहे.
राजेंद्र दशरथ गायकवाड (वय 50, रा. दौलतनगर, सातारा) हे अपघातात गंभीर जखमी झाले असून याबाबतची फिर्याद सतीश महादेव सूर्यवंशी (वय 47, रा. दौलतनगर, सातारा) यांनी शाहूपुरी पोलीस ठाण्यात दिली आहे. याबाबत शाहूपुरी पोलीस ठाण्यातून मिळालेली अधिक माहिती अशी, दि. 12 रोजी रात्री राजेंद्र गायकवाड व पत्रकार पांडुरंग पवार हे दोघे दुचाकीवरून (क्र. एम एच 11 सीसी 9937) नागेवाडी येथून साताऱ्यात परत येत होते. राजेंद्र गायकवाड हे स्वत: दुचाकी चालवत होते तर पांडुरंग पवार हे दुचाकीच्या पाठीमागे बसले होते. रात्री 11 वाजून 45 मि.च्या सुमारास दुचाकी येथील पुरुष भिक्षेकरी गृहासमोर आल्यानंतर वॅगनर कारची (क्रमांक एम एच 03 बीएच 4104) दुचाकीला पाठीमागुन धडक बसली. याचदरम्यान कारच्या पाठीमागे असणाऱ्या इर्टिगा कारची (क्रमांक एम एच 11 व्हीव्ही 7193) वॅगनर कारला धडक बसली.
या भीषण अपघातामुळे दुचाकीवरील पांडुरंग पवार व राजेंद्र गायकवाड हे दोघे गंभीर जखमी झाले. त्याचदरम्यान त्या परिसरातून रुग्णवाहिका निघाली होती. अपघात पाहिल्यानंतर रुग्णवाहिकेवरील डॉ.दिपाली पाटील व चालक तानाजी पाटील (रा.मलकापूर, कराड) यांनी जखमींना रुग्णवाहिकेमधून उपचारासाठी जिल्हा शासकीय रुग्णालयात दाखल केले. प्रकृती चिंताजनक असल्याने पांडुरंग पवार यांना पुढील उपचारासाठी तत्काळ खासगी सुपर स्पेशालिटी हॉस्पिटलमध्ये दाखल केले. पत्रकार पांडुरंग पवार यांचा अपघात झाल्याचे समजताच सातारा जिल्हा मराठी पत्रकार संघाचे अध्यक्ष हरीष पाटणे, जीवनधर चव्हाण, शरद काटकर, विनोद कुलकर्णी, अविनाश कदम, अमोल मोहिते, राजू भोसले, प्रवीण पाटील, भालचंद्र निकम, संदीप शिंदे, दीपक दीक्षित, ओंकार कदम, विठ्ठल हेंद्रे, सचिन जाधव व आ. शिवेंद्रराजे भोसले यांच्या कार्यकर्त्यांनी रुग्णालयात धाव घेतली. पवार यांच्यावर उपचार सुरू असतानाच सोमवारी सकाळी त्यांचे निधन झाल्याचे डॉक्टरांनी सांगितले. हे वृत्त समजताच पत्रकार क्षेत्रातील अनेकांनी रूग्णालयात धाव घेतली.
आ. शिवेंद्रराजे भोसले यांनी हॉस्पिटलमध्ये धाव घेवून पवार यांच्या पार्थिवाचे दर्शन घेतले. एक उमदा मित्र हरवल्याचे दु:ख आ. शिवेंद्रराजे यांनी व्यक्त केले. यावेळी जयेंद्र चव्हाण, राजेंद्र चोरगे, बापूसाहेब जाधव, फिरोज पठाण, डॉ. संदीप काटे, डॉ. प्रताप गोळे, अमित महिपाल, रफीक फरास व पत्रकारितेसह सर्व क्षेत्रातील मान्यवरांनी रुग्णालयात धाव घेतली.
दरम्यान, पालीस निरीक्षक किशोर धुमाळ यांच्या मार्गदर्शनाखाली शाहूपुरी पोलिसांनी अपघाताची दखल घेवून तपासाची चक्रे गतीमान केली. अपघातामध्ये दोन कारचा समावेश असल्याचे तपासात समोर आल्यानंतर अवघ्या काही तासात कार क्रमांक व चालकाची माहिती घेण्यात आली. वॅगनर कारवरील चालक मंगेश मोहन पवार (रा.शिवथर ता.सातारा) याच्या चुकीमुळे हा अपघात झाल्याचे प्राथमिक तपासात समोर आले आहे. रस्त्याच्या परिस्थितीकडे दुर्लक्ष करुन भरधाव वेगाने कार चालवल्यामुळे अपघात झाल्याने चालकावर गुन्हा दाखल करण्यात आला आहे.
पत्रकार पांडुरंग पवार यांच्या अपघाती एक्झिटमुळे सातारच्या पत्रकारिता क्षेत्रात हळहळ व्यक्त होत आहे. 20 वर्षांपूर्वी धावडशी या आपल्या गावातूनच त्यांनी पत्रकारितेला सुरुवात केली. विविध दैनिक, पोर्टेल या माध्यमातून ग्रामीण भागातील समस्या मांडून त्यांनी सर्वसामान्यांचे प्रश्न मांडले. धडपडी व हरहुन्नरी असे त्यांचे व्यक्तिमत्व होते. त्यांनी पत्रकारितेच्या माध्यमातून अनेकांना न्याय मिळवून दिला. त्यामुळे त्यांना पत्रकारितेतील अनेक पुरस्कारांनीही सन्मानित करण्यात आले होते. गेल्या सहा वर्षापासून त्यांनी मॅरेथॉन स्पर्धेत चुणूक दाखवली होती. तेव्हापासून अखंडपणे त्यांनी सातारा, मुंबई, ठाणे, हैद्राबाद, नवी दिल्ली येथील मिनी मॅरेथॉन स्पर्धेत सहभागी होवून या स्पर्धा गाजवल्या होत्या. अनेकांना त्यांनी मॅरेथॉनच्या मैदानात उतरवले. पांडुरंग पवार यांच्या पश्चात आई, वडील, पत्नी, मुलगा, मुलगी, भाऊ, भावजय असा परिवार आहे.