उरुळी कांचन – महाराष्ट्र लोकसेवा आयोगाच्या (एमपीएससी) 2021 साली घेण्यात आलेल्या परीक्षेचा निकाल नुकताच जाहीर झाला. या परीक्षेतून किरण पोपळघट यांनी 67 रॅंक मिळवून पोलीस उपअधीक्षक पदाला गवसणी घातली आहे. किरणचे वडील देविदास पोपळघट शेतकरी आहेत, तर आई शशिकला गृहिणी आहेत.
किरण यांना दोन भाऊ आहेत. पुणे येथील अकॅडमीचे शिक्षक प्रा. मनोहर बोळे व प्रा. रंजन कोळंबे यांचे मार्गदर्शन मिळाले. त्यांचे शिक्षण हिंगणगाव येथील जिल्हा परिषद प्राथमिक शाळेत झाले असून, पुढील शिक्षण कोथरूड येथील एमआयटीतून (MIT) , तर बॅचलर ऑफ इंजिनियरिंगची पदवी 2014 साली पूर्ण केली.
घरची परिस्थिती बेताचीच असल्याने किरण चतुःशृंगी येथील विद्यार्थी सहायक समिती वसतिगृहात राहत होता. तसेच विद्यापीठाच्या कमवा व शिका या योजनेतून उदरनिर्वाह करून शिक्षण पूर्ण केले आहे. त्यानंतर कंपनीमध्ये काम केले. पण अधिकारी होण्याचे स्वप्न त्याला झोपू देत नव्हते. त्यामुळे किरणने नोकरीला रामराम ठोकला आणि स्पर्धा परीक्षेचा अभ्यास सुरू केला.
दरम्यान, सन 2017, 2018, 2019 व 2020 साली घेण्यात आलेल्या चारही वर्षी परीक्षा पास झाला. पण किरण गुणवत्ता यादीत बसला नाही. परंतु, खचून न जाता पुन्हा अभ्यासाची जोरदार तयारी सुरू ठेवली. 2021 साली परीक्षेत चांगल्या गुणांनी पास होऊन त्याची पोलीस उपअधीक्षक पदावर निवड झाली. आणि तो लवकरच महाराष्ट्र पोलीस अकॅडमीत प्रशिक्षणासाठी दाखल होणार आहे.
किरण पोपळघट म्हणाले, मी चार वेळेस यश मिळवूनही गुणवत्ता यादीत नंबर आला नाही. मात्र हताश व निराश न होता अभ्यास सुरूच ठेवला. स्पर्धा परीक्षेची तयारी करणाऱ्या विद्यार्थ्यांनी अपयश आले तर खचून जाऊ नये, पुन्हा प्रयत्न करीत राहावे. परीक्षेमध्ये आलेल्या अपयशाला मेहनत व अभ्यासाची जोड दिल्यास यशाचे शिखर नक्कीच गाठता येते.
