- विभागप्रमुखांना आयुक्तांच्या सूचना : रजिस्ट्रेशन 30 जानेवारीच्या आत पूर्ण करून घेण्याचे आदेश
पिंपरी – करोना संक्रमणामुळे पिंपरी चिंचवड महापालिकेच्या अधिकारी व कर्मचाऱ्यांना थम्ब इम्प्रेशनमधून सूट देण्यात आली होती. शहरामध्ये आता करोनाचा संसर्ग कमी होऊ लागला आहे. त्यामुळे सर्व अधिकारी व कर्मचाऱ्यांचे 1 फेब्रुवारीपासून थम्ब इम्प्रेशनऐवजी फेस रीडिंग मशीनद्वारे बायोमेट्रिक हजेरी बंधनकारक व सक्तीचे करण्यात येणार आहे. तसे आदेश आयुक्त श्रावण हर्डीकर यांनी सर्व विभागप्रमुखांना दिले आहेत.
महापालिका आस्थापनेवर असलेल्या सर्व अधिकारी व कर्मचाऱ्यांचे फेस रींडिंग रजिस्ट्रेशन 30 जानेवारीच्या आत पूर्ण करून घेण्याचे आदेश आयुक्तांनी विभागप्रमुखांना दिले आहेत. रजिस्ट्रेशनचे काम पूर्ण झाल्याचा अहवाल 30 जानेवारीपर्यंत प्रशासन विभागाकडे सादर करावा. रजिस्ट्रेशन माहिती व तंत्रज्ञान विभागाच्या अधिकाऱ्यांसमोर करावे. रजिस्ट्रेशन न केल्यास किंवा एकापेक्षा अधिक ठिकाणी रजिस्ट्रेशन केल्याचे आढळून आल्यास संबंधित विभागप्रमुखांवर कारवाई केली जाणार आहे.
ज्या अधिकारी व कर्मचाऱ्यांना दोन वेगवेगळ्या कार्यालयाचे पदभार असल्यास त्यांना कार्यरत आस्थापना विभागाच्या अतिरिक्त अन्य ठिकाणी फेस रीडिंग रजिस्ट्रेशन विभागप्रमुखांच्या शिफारसपत्राशिवाय केले जाऊ नये असे आदेशात म्हटले आहे.