ERP Exhibition – देशाच्या विकासात महत्त्वाची भूमिका बजावणाऱ्या उद्योगांना अधिक सक्षम बनवण्यासाठी अत्याधुनिक तंत्रज्ञानाचा स्वीकार करणे अत्यावश्यक आहे. कृत्रिम बुद्धिमत्ता (एआय), डिजिटायझेशन आणि ईआरपीसारख्या तंत्रज्ञानामुळे उद्योगांची उत्पादकता आणि कार्यक्षमता वाढण्यास मोठी मदत होईल, असे प्रतिपादन दलित इंडियन चेंबर ऑफ कॉमर्स अँड इंडस्ट्रीजचे संस्थापक पद्मश्री मिलिंद कांबळे यांनी केले. शहरातील ऑटोक्लस्टर एक्झिबिशन सेंटरमध्ये एक्स्पोनॉमिक्स इव्हेंट्स प्रायव्हेट लिमिटेडच्या वतीने आयोजित भारतातील पहिल्या ईआरपी औद्योगिक प्रदर्शनाच्या उद्घाटन प्रसंगी ते बोलत होते. कार्यक्रमाच्या प्रास्ताविकात संचालक सागर अहिवळे यांनी देशभरातील १०० हून अधिक ईआरपी कंपन्या, तंत्रज्ञान पुरवठादार आणि स्टार्टअप्स या प्रदर्शनात सहभागी झाले असल्याची माहिती दिली. याप्रसंगी प्रदर्शनाविषयी माहिती देणाऱ्या मार्गदर्शिकेचे प्रकाशन करण्यात आले. तीन दिवस चालणाऱ्या या प्रदर्शनात उत्पादन, वित्त, लॉजिस्टिक्स, रिटेल, हेल्थकेअर, कन्स्ट्रक्शन आणि एडटेक क्षेत्रांतील अत्याधुनिक ईआरपी आणि डिजिटल सोल्युशन्स सादर करण्यात येत आहेत. तसेच तज्ज्ञांची मार्गदर्शन सत्रे, कार्यशाळा आणि प्रात्यक्षिकांचाही अनुभव उपस्थितांना घेता येणार आहे. हे प्रदर्शन शनिवारपर्यंत (दि. ९) सर्वांसाठी विनामूल्य खुले राहणार आहे. कार्यक्रमात आरती भोसले-अहिवळे आणि श्रद्धा कुलकर्णी रॉड अल्बुकर्क, दीपान रामलिंगम, महेंद्र फणसे, प्रसाद कुलकर्णी आणि दिलीप बटवाल यांनी मनोगत व्यक्त केले. राजेंद्र पाटणकर आणि दीपक म्हस्के यांनी कार्यक्रमाचे सूत्रसंचालन केले, तर मिलिंद हडप यांनी आभार मानले. यावेळी एक्स्पोनॉमिक्सचे संचालक सागर अहिवळे, मिलिंद हडप, आरती भोसले-अहिवळे, सनवन टेक्नॉलॉजीच्या संचालक श्रद्धा कुलकर्णी, अप्लिका कन्सल्टन्सीचे प्रमुख रॉड अल्बुकर्क, रिंगफेडरचे सीईओ दीपान रामलिंगम, इंद्रायणी इंडस्ट्रियल असोसिएशनचे अध्यक्ष महेंद्र फणसे, रोटरी इलाईटचे इरफान आवटे, प्रसाद कुलकर्णी आदी उपस्थित होते.