कर्मचारी भविष्य निर्वाह निधी संघटना म्हणजेच EPFO चे देशभरात करोडो सदस्य आहेत. ईपीएफओने आपल्या सदस्यांसाठी मार्गदर्शक तत्त्वे आणि धोरणांमध्ये काही मोठे बदल करण्याचा निर्णय घेतला आहे. हे बदल नवीन वर्षापासून लागू होणार आहे. तर हे बदल कोणते आहेत जाणून घेऊया…
1) ATM द्वारे PF चे पैसे काढण्याची सुविधा
EPFO ने सदस्यांना अधिक सुविधा देण्यासाठी ATM कार्ड जारी करण्याचा निर्णय घेतला आहे. यामुळे खातेधारकांना कधीही पैसे काढता येणार आहेत. ईपीएफओची ATMमधून पैसे काढण्याची सुविधा पुढील वर्षी म्हणजेच 2025-26 मध्ये सुरू होण्याची शक्यता आहे. यामुळे 24 तासांमध्ये कधीही सहजपणे पैसे काढता येणार आहेत. यामुळे लोकांचा बराचसा वेळ वाचणार आहे.
2) कर्मचाऱ्यांच्या योगदान मर्यादेत बदल
आगामी वर्षात EPFO योगदान मर्यादेत बदल करण्याचा सरकार विचार करत आहे. सध्या कर्मचारी आपल्या मूळ पगाराचा 12% EPFO खात्यात योगदान देतात. मात्र सरकार कर्मचाऱ्यांना 15,000 रुपयांच्या मर्यादेऐवजी प्रत्यक्षात त्यांच्या पगाराच्या आधारावर योगदान देण्याची परवानगी देण्याचा विचार करत आहे. यामुळे कर्मचारी त्यांच्या निवृत्तीपर्यंत मोठ्या प्रमाणात निधी जमा करू शकतील आणि दरमहा अधिक पेन्शन मिळवू शकतील.
3) EPFO सिस्टम अपडेट
EPFO आपली आयटी सिस्टम अपडेट करत आहे. ज्यामुळे PF क्लेम करणाऱ्या सदस्यांना त्यांची रक्कम काढणे अधिक सोपे होणार आहे. सिस्टम अपडेट करण्याचे काम जून 2025 पर्यंत पूर्ण होण्याची अपेक्षा आहे.आयटी सिस्टम अपडेट झाल्यावर क्लेम जलद आणि पारदर्शकपणे निपटवले जातील. यामुळे फसवणुकीचे प्रमाण कमी होऊ शकते.
4) इक्विटीमध्ये गुंतवणुकीची सुविधा
EPFO आपल्या सदस्यांना इक्विटीमध्ये गुंतवणुकीची परवानगी देण्याचा विचार करत आहे. यामुळे PF खातेधारकांना आपला निधी अधिक प्रभावी पद्धतीने व्यवस्थापित करण्याचा पर्याय मिळेल. जर सेवानिवृत्ती निधी संघटना थेट इक्विटी गुंतवणुकीस मान्यता देते, तर सदस्यांना उच्च परताव्याची अपेक्षा करता येईल.
5) पेन्शन काढण्यात सोय
EPFO पेन्शनधारकांसाठी मोठा बदल करत आहे. नव्या नियमांनुसार पेन्शनधारक व्हेरिफिकेशनशिवाय देशातील कोणत्याही बँकेतून आपली पेन्शन काढू शकतील. या निर्णयामुळे सदस्यांना खूप सुविधा होईल, तसेच त्यांचा बराच वेळ वाचणार आहे.
